Kalaallit eqqumiitsuliortut Danmarkimi saqqummersitsisut

Immikkut ittumik inuiattut ullorsiornitsinni saqqummersitsisoqarpoq. Nunatsinniillu ungasissumi Vejlemi saqqummersitsisoqaraluartoq Kalaallit Nunaat qitiuvoq.

Kalaallimmi eqqumiitsuliortut suli inuusut 13-it eqqumiitsuliaat saqqummersitsinermi ”Imaq”-mik taaguutilimmi saqqummersinneqarput. Peqatigiiffik NUKIGA Danmarkimi nunarput pillugu ilisimasaqarnerulernissamik suliniutilik aaqqissuisuuvoq.

- Sumiiffiimmi marluk immamit ataatsimoortinneqarlutillu avissaaqqatinneqarput. Taamaammat taassuminnga sammisassatut toqqaaneq killitsisimanartupilussuusinnaasoraara, saqqummersitsinermik aqutsisoq, Laila Lund Altinbas, oqarpoq.

Imaq pillugu assigiinngitsunik eqqumiitsuliortoqartoq

Assigiinngitsunik piginnaanillit saqqumersitsisinnaanerat taassuma tulluusimaarutigaa.

- Assigiinngitsunik eqqumiitsulioriaasilinnik toqqaavugut. Alutornarluinnartunik suliaqarput. Saqqummersitsineq kusanartorujussuullunilu attortinnartupilussuusoq arlallit oqaatigaat, Laila Lund Altinbas oqarpoq.

Eqqumiitsuliortut 13-it marrak, annoraamineq nipilu atorlugit taavalu ujaqqanut kigartuillutik eqqumiitsuliorput.

Ilaasa eqqumiitsuliaat piniarnermut, oqaluttuatoqqanut kalaallillu kulturiannut tunngassuteqarput, ilaasalu eqqumiitsuliaat kinaassusermut, silap pissusaata allanngoriartorneranut naalagaaffiillu pillugit politikkimut taavalu soorunami nunatta Danmarkillu akornanni avissaartuunnemut tunngassuteqarlutik.

- Kalaallit Nunaata Danmarkillu akornanni pissutsit pillugit eqqumiitsuliat arlaqarput. Saqqummersitsinerup Kalaallit Nunaanni eqqumiitsuliornermut takutitassaqarfiulluartuaannartumut ilisimasaqarnerulersitsinissaa neriuutigaarput. Danmarkimut atatillugu saqqummersitsinerni saqqummerneq ajortunik.

Eqqumiitsuliat paasititsissasut

Kalaallit Nunaannik ilisimasaqarnerulersitsinissaq NUKIGA-mi suliniutaavoq. Taamaammat Laila Lund Altinbasip eqqumiitsuliat paasinninnerutitsisinnaanissaat neriuutigaa.

- Isummat pigiliutigiinnakkat allanngortissagutsigit immitsinnut ilisimasarinerulernissarput pingaaruteqarpoq. Naalagaaffeqatigiikkatta, Kalaallit Nunaata Danmarkimi ilisimaneqarnerulernissaa kissaatiginaraluarpoq. Paasisimasaqarnerulernissamut ikiutaasinnaanissarput neriuutigaarput.

Saqqummersitsineq taanna Vejlemi, Københavnimi, Aarhusimi Aalborgimilu takutinneqassaaq.

Aamma Nuummi Katuami septembarip ulluisa arfineq-aapppaannit oktobarip ulluisa arfineq-aappaannut takutinneqassaaq.