Kalaallit Danmarkimi ilinniartut oqallisaasut: Pisariaqartippavut

“Kalaaliunerit eqqarsaatigalugu pinningaaravit”, aamma “qallunaatuullaqqingaaravit”.

Kalaallit ilinniartut Danmarkimi ilinniartoqatiminnit taama oqarfigineqakkajupput.

Danmarkimi ilinniartut nunatsinneersut kalaaliunertik pillugu ilinniartoqatiminnit pigiliutiinnakkanik isumaqarfigineqartartut, kinaassusersiorfigineqartartut katersuunnernilu ilaatinneqartanngitsut, Danmarkimi inuttut pisinnaatitaaffinnik ilisimatusarfiup nalunaarusiaani 2023-meersumi inerniliussaavoq.

Pissutsillu taamaattut Folketingimi ilaasortat IA-meersup Siumumeersullu atuukkunnaarsikkusuppaat.

Taamaammat kalaallit Danmarkimi ilinniartut atugaat ukkatarineqarlutik oqallitsitsiniarput. Danmarkip ministeriunera Mette Frederiksen (S) Marienborgimi maajip ulluisa arfineq-aappaanni oqallinnissami aamma peqataassaaq.

- Orniguttut kalaallit Danmarkimi ilinniartut tarnikkut pitsaanerusumik qanoq atugaqarsinnaanerannik oqalliseqataanissaat siunertaraarput, aammali Danmarkimi ilinniareernerminni nunatsinnut angerlaqqittartut amerlinissaat qanoq qularnaarsinnaaneripput, IA-meersoq Aaja Chemnitz oqarpoq.

Angalanermut bilitsit ilinniartunut akikillineqarpata nunatsinnukakulanerulersinnaassasut

Kalaallimmi Danmarkimi ilinniartut affangaajaannaat ukiuni pingasuni ilinniartooreernerminni nunatsinnut angerlaqqissimasut, Naatsorsueqqissaartarfiup kisitsisaataani erserpoq.

Nunatsinnut angerlaqqittartut ikippallaarujussuartut, Aaja Chemnitz isumaqarpoq. Taamaammat kalaallit Danmarkimi ilinniartuunerminni nunatsinnut attaveqarnerunissaat qanoq anguneqarsinnaanersoq Marienborgimi aamma oqallisiginiarpaat.

- Nunarput ilinniarluarsimasunik pisariaqartitsivoq. Inuusuttortavut ilinniarluarsimasut nunatta ineriartortinnissaanut pisariaqartilluinnarpagut, Aaja Chemnitz oqarpoq.

Nunatsinnukarneq kalaallinut Danmarkimi ilinniartunut 1000 koruuneqalernissaa, Aaja Chemnitzip oqallinnermi siunnersuutiginiagaanut ilaavoq.

Kalaallit Danmarkimi ilinniartut nunatsinnukarnissamik ukiumut ataasiarlutik qinnuteqarsinnaapput. Nunatsinnukarnerli taakkununnga akikillineqarpat ukiumut arlaleriarlutik nunatsinnukarsinnaalissasut, IA-meersoq oqarpoq.

Ilinniartoqataasa pigiliutiinnakkanik isumaqarfigiunnaartariaqaraat

Aaja Chemnitz ministeriunermut Mette Frederiksenimut (S) Folketingimi sapaatit akunnerata siuliani apeqqarissaanermi kalaallit Danmarkimi ilinniartut atugaannut tunngasumik aamma apeqquteqarpoq.

Kalaallit Danmarkimi ilinniartut ilinniarfimminni toqqissisimasutut peqataatinneqartutullu misigisimanissaat qanoq qulakkeerniarneritsik Mette Frederiksen aperineqarami ima akivoq:

- Ilinniartoqataasa kalaallit Danmarkimi ilinniartut pigiliutiinnakkanik isumaqarfigiunnaarlugit taakkua ataqqinnittumik naapittarpatigit pisariinnerpaassaaq.

- Tamatumunnga naalakkersuinikkut aalajangiisariaqanngilagut, ilinniartummi ataasiakkaat inoqatiminnut allanut qanoq pissuseqassanerlutik namminneerlutik eqqarsaatigeqqittariaqarpaat, Mette Frederiksen oqarpoq.

Kalaallit Danmarkimi ilinniartut aallartinissarluarnerunissaat Kalaallit Nunaanniillu Danmarkimut nuulluarnerunissaat ilinniarfiit aaqqissuinerminni ilaatinnerusariaqaraat, ministeriuneq aamma isumaqarpoq.

Ministeriunerulli akissutaa politikererpallannerusoq, Aaja Chemnitz isumaqarpoq.

- Ilinniartut kisimik akisussaaffiginngilaat. Ilisimatusarfiimmi aamma akisussaaffigaat, aammali Danmarkip naalakkersuisuisa akisussaaffigilluinnarpaat, taanna oqarpoq.