Kalaallip 46-nik ukiullip Danmarkimi tarnikkut napparsimasunut immikkoortortami toqutsineq nassuerutigaa

Angut kalaaleq 46-nik ukiulik angutip, kalaallip 41-nik ukiullip Aarhus Universitetshospitalip tarnikkut napparsimasunut immikkoortortaani ippassaq toqunerata kingunerisaanik Aarhusip eqqartuussiviani inatsit tunngaviusoq naapertorlugu ullumi killisiorneqarpoq.

Angutip toqutsineq nassuerutigaa, taassumalu Østjyllandip Politiivinut pinerlineqartup piffissami sivisuumi paamitsatseqqasimammani taama iliorsimallugu saassussinermi kingorna oqaatigisimagaa eqqartuussivimmi saqqummiunneqarpoq.

Tv2 Østjylland taama allaaserisaqarpoq.

Tusagassiorfik naapertorlugu angutip ingiallorteqarani anisinnaanermini savik Skejby Centerimi Føteximi pissarsiarisimagaa eqqartuussivimmi aamma saqqummiunneqarpoq.

- Føteximi iggavimmi savimmik angisuumik pisinnginnermini pujortarsimavoq, kebabitorsimallunilu, taakku allapput.

Tamatuma saniatigut nunatsinni toqutsisimasutut toqutseriarsimasutullu eqqartuunneqarnikuusimasoq aamma saqqummiunneqarpoq.

Issiavissuarmi ornavaffilimmi saassunneqartoq

Pinerlineqartoq issiavissuarmi ornavaffilimmi issiasoq saassunneqarsimavoq. Angut arlaleriarluni kapineqarsimasoq saassunneqarnerminillu pakkersimaariniarsimasoq kisianni ikiligaanerminit aaverussimasoq aamma saqqummiunneqarpoq.

- Sulisut aqutsisullu qisuariarsimasuuppata pisoq pinngitsoortinneqarsimasinnaagaluartoq, unnerluutigineqartoq oqarpoq.

- Nalunngilara pisuussutigalugu, taanna oqarpoq.

Angut tarnikkut qanoq inneranik misissorneqassaaq matoqqasumillu sapaatini akunnerni sisamani paarunneqassalluni. Tassa imaappoq pisumi matumani tarnikkut napparsimasunut immikkoortortami isumannaatsumi apriilip 24-ata tungaanut parnaarunneqarsimassaaq.