Kulturi

VIDEO Juullip nipitittagaa ullumi saqqummissaaq

Juullip nipitittagaanut qalipakkat eqqumiitsuliallu tunngaviliisut, allaallumi Dronning Margrethep siilikimik nipitittagaliaa Nunatta Katersugaasiviani ullumi nalunaaqutaq pingasunit alakkarneqarsinnaalissapput.

Allattoq Pipaluk Høegh

oktobarip 28-at 2015 13:17

- Aana Nunatsinni juullip nipitittagaa siulleq. Saqqummersinneqarpoq 1974-imi, Jens Rosingip sanavaa, assut alutornarpoq, Manumina Lund Jensen Katersugaasivilersoq taama oqarpoq.

Aamma atuaruk Aajuna juullip nipitittagaa

Nutaajunerusulli aamma saqqummersinneqassapput.

- 2012-imi juullip nipitittagaanut Malînánguak M. Mølgaard ajugaavoq, qalipagaq assut alutornartoq aamma aajuna taaguuteqarporooq Issittup Qitornai, takusinnaavagut tunumiut atisaat, kitaamiut atisaat avanersuarmiullu atisaat, Manumina Lund Jensen oqarpoq.

Aamma atuaruk Kunngissaq juullip nipitittagaanik uleersivoq

Qalipakkat eqqumiitsuliallu juullip nipitittagaataanik tunngavilliisut assigiinngisitaartut saqqummersinneqarnissaat pingaartissimavaat, qalipakkat ilaat upperisamut tunngapput, ilai kulturimut oqaluttuatoqqanullu, aammali ilaqutariinnermut tunngasut qalipakkat saqqummersinneqassapput, pinngortitarlu nunattalu uumasui aamma juullip nipitittagaani ilaakkajuttarput.