Juaaka Paamiunut aliikkusersuiartulersoq

Tallimanngornermi apriilip 25-ani ullaakkut nal. 10.00 – 11.00 katersortarfimmi Taqqissuummi ”affarmik nipaannarmik” Tuviisami atuartunut ilinniartitsisuinullu tusarnaartitsisoqassaaq.

Tassani Juaakap meeqqanut erinarsuusiani, meeqqat pinnguatitoqaannik qittasitoqqanillu ilallugit aliikkusersuutiginiarpai, taallanik atuaasarnermik akullattaarlugit.

Unnuk taannattaaq katersortarfik Paamiormiunut piumasunut tamanut ammassaaq, tassani Juaaka tusarnaartitsissammat marlunnik immikkoortortalimmik.

Immikkoortup siulliup imarissavai taalliat aamma atuakkiamit ”Naleqqusseruttortut”-mit tigusillattaalaarneq aamma maanna atuakkiarineqartumit ”Inukassak”, tamakku erinnanik akunnilertarlugit aliikkusersuutigineqassapput.

Immikkoortup aappaani højtalerit nipittorneqassapput Juaaka Bandilu tamarmiulluni tusarnaartitsissaaq.

Juaaka Band ukuupput: Juaaka (erinarsortoq guitarertorlu, Pilu Noahsen (erinarsortoq) Leif Immanuelsen (supputaasaq, pattagiaq, erinarsortoq), Juuna Zethsen (el-guitar, erinarsortoq), Hans Jørgen Damgaard (bas, erinarsortoq), Kristian Otto Therkildsen (tumerparpaartoq) – taakku appisimaavataarniarput.

 Arfininngornermi apriilip 26-ani ullaap tungaani, utoqqaat illuarmiut taallanik erinnanillu aliikkusersorneqassapput.

Tusarnaartitsinissanut iserneq akeqassanngilaq, aaqqissuussinerillu tamarmik aalakoornartulinnik imigassartaqassanngillat.

Sermersooq-Paamiut sunngiffimmi sammisassaqartitsisoq Enok Poulsen, Paamiut-Asasara, aaqqissuussisuuvoq, tusarnaartitsinissallu aningaasaliiffigineqarput Tips- & Lottomit, aamma Aningaasaateqarfik Sermermit.

- Enok Poulsenip qaaqqusinerata aaqqissuussiniarneq tamaat aallartippaa, nuanneqaarlu Paamiuliarniarnerput iluatsimmat. Ukiuni 45-ini nipilersortarlungalu assigiinngitsutigut aliikkusersuisarpunga- kiisamili aatsaat – siullerpaamik – Paamiuni tusarnaartitsisussanngorpunga. Assorsuaq nipilersoqatikkalu qilanaarpugut, Juaaka oqarpoq.

Paamiuni nipilersoriiginnarluni Juaaka Norgeliarluni aallassaaq, tassani atuakkanut nunat tamalaat festivalianni “bogstavelig talt” qulingiluassaanni maajip aallaqqaataanit sisamaanut, Tvestrandimi pisussami peqataassalluni. Taanna suleqatigiiffiup Organisation of Booktowns aaqqissuussaraa. (www.bokbyen-skagerrak.no).