Juaaka atuakkiortut peqatigiiffianni siulittaasunngorpoq
Atuakkiortoq ilinniartitsisorlu, Hans Anthon Lynge, atuakkiortut peqatigiiffiata siulersuisuini ukiuni 36-ni sulereerluni tunuartoq taarserpaa. Aammattaaq Aqqaluk Lynge, Karl Elias Olsen aamma Cecilie Vahl siulersuisunut qinigassanngorteqqinngillat.
Tupaarnaq Rosing Olsen allatsinngorpoq, Sørine Steenholdt aningaaserisunngorluni, siulersuinullu ilaasortanngortat allat tassaapput Juana Petrussen aamma Kirstine Kreutzmann.
Ilaasortat amerlisarniarneqassapput
Assiliartalersuisartut, assiliartassanik titartaasartut, allallu atuakkanik saqqummersitsisarnermik ulluinnarni suliaqartut, atuakkiortut peqatigiiffiannut ilaasortanngorsinnaanissaannut periarfissanik siulersuisunngortut ilaatigut misissuiniarput. Peqatigitillugu kalaallit qallunaatuinnaq oqaluttut atuakkiortulluunniit allat kalaallisut oqalussinnaanngitsut nunatsinnili najugaqartut ilaasortanngorsinnaanissaannut periarfissat aamma misissorniarpaat.
Kiisalu atuakkialerituut atuakkiortullu allatigullu atuakkanik nunatsinnut tunngasunik soqutigisaqartut atuakkanik sammisaqarlutik naapeqatigiittarfissaannik “Kalaallit Nunaanni Atuakkialerituut”-nik taaneqarsinnaasunik pilersitsisoqarsinnaanera siulersuisunngortunut suliakkiissutigineqarportaaq.