Johan Lund Olsenip Sara Olsvig taarserpaa
- Danskit naalagaaffiata suli akisussaaffigisaani naligiittoqarnissaa qulakkeerniassavarput. Tamanna aningaasanut inatsisissap qallunaat naalakkersuisuinut isumaqatiginiutigineqarnissaannut anguniagassani pingaarnertut Johan Olsenip oqaatigaa.
Qinersisoqannginnerani suliassaasa siullersaat annersarigunagaallu tassaassagunarpoq Christiansborgimi isumaqatigiinniarnerit.
AAMMA ATUARUK Olsvig: Nunarput akisussaaffimmik anginerusumik tigusivoq
Ingammillu nunatsinni eqqartuussiveqarneq - suli Danmarkip akisussaaffigisaa - ukioq manna Johan Lund Olsenip aningaasaliiffigineqaqqittariaqarsoraa.
Kalaallit sulisut akissarsiakinnerusut
Pinerlussimasunik inissiisarfinni kalaallit qallunaallu sulisut akissarsiatigut naligiilernissaat anguniarlugu.
- Pinerluttunik isumaginnittoqarfik suli qallunaat naalagaaffiata tigummivaa, tassanilu paasinarsivoq pinerlussimasunik inissiisarfinni kalaallit ilinniarsimallutik sulisut qallunaanut suleqatiminnut naleqqiullutik akissarsiakinnerusut.
- Tassalu sumi ingunngorsimaneq tunngavigalugu akissaasersuineq aaqqinniagassarput. Suliat assigiit assigiimmik akilersorneqariaqarput. Johan Lund Olsen KNR-imut taama oqarpoq.
Angerlarsimaffeqanngitsut sullikkusuppai
Tamatuma saniatigut kalaallit inuuniarnikkut ajornartorsiortut Københavnimiittut angerlarsimaffeqanngitsut aalajangersimasumillu ineqanngitsut angerlarsimaffeqalernissaat Inuit Ataqatigiit kissaatigaat.
- Naalagaaffiup angerlarsimaffeqanngitsunut suliniutaanut kalaallit ilannguttariaqartut, Johan Lund Olsen oqarpoq.
- Isertorneqarsinnaanngilaq kalaalerpassuit ajoraluartumik siunertaqaratik akissaqaratillu Danmarkiliartarnerat assullu navianartorsiortarlutik.
- Qallunaat aningaasanut inatsisaat aqqutigalugu atugarliornerpaat pensionatimik inissaannik pissarsisoqarsinnaassaaq.
AAMMA ATUARUK Johan Lund Olsen Folketingimi ilaasortanngussaaq
Qallunaat aningaasaqarnermut ministerianut piumasaqaataassooq, qinersiviup matuma iluani aatsaat Folketingimi Siumut peqatigalugu saqqummiunneqartussaq.
- Tamanna assut nuannaarutigaara, ataqatigiillutami kalaallinut inuiaqatigiinnut aningaasanik pissarsisariaqarpugut, Johan Lund Olsen oqarpoq.