Jens Napãtôk Inatsisartuni taperserneqartoq: Nipangiusimasussaatitaanermik unioqqutitsinngitsoq

Siumup Naleqqamit politikeri, Jens Napãtôk nipangiusimasussaatitaanerminit unioqqutitsisimasutut pasigaa KNR-imit ippassaq saqqummiupparput.

Partiit oqarnera naapertorlugu Jens Napãtôk Aalisarnermut, Piniarnermut Nunalerinermullu Ataatsimiititaliami matoqqasumik ataatsimiinnermit paasissutissanik ingerlatitseqqiisimavoq.

Tamannalu Inatsisartut ileqqorissaarnissamut aalajangersagaanik unioqqutitsineruvoq.

Naleqqamiilli poltiikeri pasineqarneranut tunngavissaqanngitsoq nalilerneqartoq Inatsisartut siulittaasoqarfianit oqaatsitigut ilisimatinneqarpoq. Aalajangiinerlu taanna allakkatigut aamma pissarsiaraa. KNR-ip allagaq taanna takunnissinnaaffigaa.

Kinguneqartitsinissamut tunngavissaqanngitsoq

Siulittaasoqarfik naammagittaalliummut atatillugu kinguneqartitsiniarnani aalajangersimasoq tassani allassimavoq.

Siulittaasoqarfiup paasissutissat pissarsiarisani Jens Napaattuup paasissutissanik ingerlatitseqqiineranik naliliinissamut naammanngitsut pingaartippaa.

Suliaq Inatsisartuni taamaalilluni maanna matuneqarpoq.

Akileraartarnermut aningaasaqarnermullu naalakkersuisup, Siumumilu siulittaasup, Erik Jensenip Jens Napaattuumut atatillugu politiinut unnerluutiginnittoqarnissaa sulissutigineqartoq KNR-imut allakkatigut uppernarsarpaa.

KNR-ip Erik Jensen apersorniarsaraa.