Issittumi Ruslandip sakkutooqarnikkut pissaaneqarnerulernissaa, Putin-ip piumasaraa

Præsident Vladimir Putin taama isumaqartoq nutaarsiassaqartitsivik Interfax nalunaaruteqartoq, qallunaat aviisiat ullormut saqqummersartoq Politiken allappoq.

Nunap imartamini avannaaniittuni piginnaatitaaffini illersorniarai, isumannaallisaanermut ataatsimiititaliaq ataatsimeeqatigereerlugu taama nalunaaruteqarpoq.

Ilutigitillugu Moskva nutaamik naalagaaffiup ingerlataanik aqutsisoqarfittaassaaq, russit Issittumi politikkiannik isumannaarisussamik.

- Isumannaallisaanermut tunngasut tamarmik erseqqarissuussapput, illersornissaqarfimmiillu, sillimaniarnermullu ministeriaqarfimmiit allaniillu sungiusarnertigut qulakkeerneqassasut Putinip piumasaraa.

- Nunanut allanut politikki allanngorartuussaaq, isumaginninnikkut aningaasarsiornikkullu nunarsuarmi ingerlaneq nalorninartoqaqisoq unamminartoqaqisorlu Ruslandip soqutigisaanut unammillermata;  aamma issittumi," Putin tunngavilersuivoq.

Tikkuarpaalu uuliamik gassimillu annertoorujussuarnik issittumi peqqumaateqariataarsinnaammat.

Pinngortitamik illersuiniaqatigiiffimmi Greenpeacimi isummaminnik siaruarteriniat russit siorna paarnaaruppaat, issittumi uuliamik ujarlertut akuliuffigimmatigit. Qaammatit arlallit qaangiuttut imaani ujajaaniatut eqqartuunniaraluaramikkit unitsiinnarpaat.

Naalagaaffiit arlaqartut issittup imartaanik piginnittuunissartik piumasaraat, Danmark Kalaallit Nunaallu tamakkununnga ilaapput.