Issittumi attaveqaqatigiinnerup nukittorsarnissaa Hjalmar Dahlip sulissutiginiarpaa

Kalaallit Nunaata ukiuni sisamani siulittaasuutitaqareersoq Aqqaluk Lyngep siulittaasuuffik Okalik Eegeesiakimut Canadameersumut tunniuppaa, Hjalmar Dahlilu Martha Abelsenilu siulersuisuunerni ukiuni tullerni sisamani ilaasortassatut toqqarneqarlutik.

Carl Christian Olsen (Puju) taarserlugu siulersuisuunerni ilaasortanngortoq, Hjalmar Dahl, naapertorlugu nalunaarut ataatsimeersuarnermut aallartitanit akuersissutigineqarlunilu atsioqatigiissutigineqartoq maanna sulissutigineqartussanngorpoq.

- Nunani tamalaani suleqatigiinneq, siulersuisut siuliisa sulissutigisimasaat ingerlateqqinneqassaaq. Ilaatigut silap pissusiata nunanut issittumiittunut sunniutai suleqatigiissutigineqassallutik.

AAMMA ATUARUK Aqqaluk Lynge pillugu atuakkamik saqqummertoqarpoq

- Tamatuma saniatigut aamma nunat akornanni attaveqaqatigiinnerup pitsanngorsarneqarnissaa siulersuisut sulissutiginiarpaat, tamannami nuanut issittumiittunut ataasiakkaanut aningaasarsiornikkut siuariartornermut aqqutissaasinnaammat, Hjalmar Dahl, siulersuisuunerit nutaat toqqarneqarnerinut atatillugu tusagassiortunik katersortitsisoqrmat taama oqarpoq.

Nunat tusagassiuutaasa akornanni suleqatigiinnerup nukittorsarneqarnissaa ICC-p aamma sulissutiginiarpaa, soorlu asersuutigalugu Inuvimmit, Alaskamit Tjukotkamiillu nutaarsiassat amerlanerusut pissarsiarisalerllutigit. Aammattaaq soqutigisaqaqtigiiffiit akornanni attaveqaqatigiinnerup nukittorsarnissaa sulissutigniarpaa, soorlu assersuutigalugu issittumi nunani aalisartut piniartullu kattuffiisa akornanni.

Siulersuisuunernut ilaasortanngortut allat tassaapput James Stotts, ICC Alaskami siulittaasoq, Tatiana Achirgina aamma Elena Kaminskaya Ruslandimi Tjukotkameersut, Duane Smith, ICC Canadami siulittaasoq, nunaqqataalu Herb Nakamayak.