Isornartorsiuisut ilaqqipput: Aalisarnermi taamatut aqutsisoqarsinnaanngilaq

- Siunnersuut eqqarsaatigilluagaanngilaq, aalisarnermik aqutsinitsinnik tatiginninneq sequmissinnaavaa - taava aamma aalisakkanik ilisimatuut misissuisittaraanni tusarnaassanagillu, iluaqutaanngilaq? Taanna aperaaq.

- Tunngavissaqanngilluinnarluni pisassat amerlisinnissaat isumassarsiatsialaasorinngilarput, Henrik Leth oqarpoq.

Qaleralinniarnermi aqutsiveqarfinni pingasuni qaleralittassat amerlinerannik kinguneqartussamik, Siumup politikkikkut oqaaseqartartua Karl Kristian Kruse siunnersuuteqareertorlu isornartorsiuisut imaaginnavipput.

Siunersuutip isumaliutigilluagaannginnera, Henrik Lethip tikkuarpaa, taamaaliornikkut qalerallit MSC-mik, pisisartut nuannarisaannik, meqqilersornissaannik pilersaarut sequminneqarmat.

Tutsuiginassuseq pineqarpoq

KNAPK siunnersuummik aamma arfininngormat isornartorsiuivoq, akit apparnissaat ingammik ernummatigalugit.

Akilli apparnissaat Henrik Lethip aarlerinartitaani annerpaanngillat. Tonsialunnik tunisat amerligaluaraanni, akit apparnavianngillat. Isumakuluutiginerpaasaali tassa, siunissami qaleraleqassanersoq, minnerunngitsumillu qaleralinniarnermik aqutsinermut tutsuiginassuserput tatigineqarnerpullu ajoquserneqassammata:

- Taamaaliornikkummi aalisarnermik aqutsinermut tatiginninnimininnguussimasoq nungussaaq. Aqutsinermi allangujaassuseqarnersoq upperiuminaappoq. Tassami aningaasarpassuit atorlugit aalisarnermi atortussanik pissarsiniarniaraanni, taava aqagu ilumut aalisagaqassanersoq, qanoq ililluta nalussanngilarput?

- Qanorluunniit pisoqaraluarpat qaffaanissaq piareersimaffigineqartoq erseqqilluinnarpoq, inuiaqatigiit taama aqunneqarsinnaanngillat, Henrik Leth oqarpoq.