Islandimiut kalaallillu niueqatigiinneq nukittorsarusuppaat
Taama oqarpoq Kalaallit Nunanni aningaasaqarnermut nunamullu namminermut naalakkersuisunut ilaasortaq Islandimiut kalaallillu niueqatigiinnikkut suleqatigiiffiata ataatsimiinnerani.
-Islandimi suliffeqarfiit Kalaanit Nunaannik soqutiginninnerujussuat Islandimi ineriartornermik sunniuteqarpoq, takornariaqarnikkummi, aalisarnikkut aatsitassarsiornikkullu piffimmilu kingullermi avataasiorluni uuliamik ujaaasinermi nutaanik periarfissaqarpoq, taama oqarpoq Kalaallit Nunanni aningaasaqarnermut nunamullu namminermut naalakkersuisunut ilaasortaq Islandimiut kalaallillu niueqatigiinnikkut suleqatigiiffiata GLIS-ip Islandimi Hotel Naturami ataatsimiinnerani.
Hotel Naturami ataatsimiinnermi nunat marluk aningaasaqarnermut naalakkersuisui Vittus Qujaukitsoq aammalu Bjarni Benediktsson Islandimi suliffeqarfiit angisuut sisamat aallartitai peqatigalugit ataatsimeeqataapput, ilaatigut piffissap ingerlanerani ullumikkumut nunat akornanni attaveqatigiinneq oqaluuserineqarluni.
-Nunat marluk imminnut qanittunik inissisimanerisa oqaluttuarisaanermilu kulturikkut attaveqatigiinneq peqqutigalugit Island tassaavoq siunissami Kalaallit Nunaanni suleqatissat annersaat, Qujaukitsoq oqarpoq.
