IsiØjeEye: Atuagaq nuannarineqarluarpoq

Assit 40-it pitsaanerpaatut toqqarneqartut atuaganngorlugu saqqummiunneqarsimapput. Atuagaq 1000-nngorlugu saqqummersinneqarsimavoq, affaalu pisiarineqareersimallutik. Tamannalu unammisitsinermi isumassarsisup iluarisimaarpaa.

-Isumaqarpunga nuannersorujussuusoq, assinik unammisitsinissamut isumassarsisoq, Pipaluk Lykke Løgstrup, oqarpoq.

Taassuma nunatsinni kalaallit nammineq pigisaminnik saqqummersitsinissaminnut periarfissinniarlugit, unammisitsinissaq isumassarsiarisimavaa.

Assinillu unammisitsinermi Kalaallit Nunaani najugaqartut kisimik periarfissinneqarsimapput.

- Kulturimut attuumassuteqartunik sammisassaqartitserusussimavunga. Isumaqarama nunatsinni tamanna amigaatigigipput, isumaqaramalu nunatsinni amerlasuut kulturimut tunngasumik ataatsimut ilaaffigisinnaasaminik amigaateqartut. Kinaagaluaruniluunniit, eqqumiitsuliortuunngikkaluaruniluunniit imaluunniit nipilersullaqqittuugaluaruniluunniit assinik saqqummersitsinissaminut periarfissinneqartariaqarami, Pipaluk Lykke Løgstrup oqarpoq.

Unammisitsinermi assinik nassiussisut assigiinngitsuupput. Assersuutigalugu meeqqat atuarfianni atuartuniit, utoqqarnut 60-t tungaanut ukiullit nassiussisimapput.

Assit katillugit 171-it unammisitsinermut nassiunneqarsimapput. Kulturitsinnut tunngasumik sammisassaqarnissamut inuit soqutiginnissimasut, Pipaluk Lykke Løgstrupip eqqoriarpaa.

- Ilimagaara inuit takutitsinissaminnut ammaanneqaramik nuannaralugu akorluarsimagaat. Assiliivitsillu atorluarlugu kulturimut tunngasumik assiliillutik peqataapput, Pipaluk Lykke Løgstrup oqarpoq.

Unammisitsinissamut tapersersorneqarluni aningaasaliisussanik amigaateqarsimanngilaq.

- Unammisitsinissap piviusunngortinnissaanut aningaasanik pisariaqartitsisimavunga. Unammisitsinissamullu soqutiginnittunik tapersersorneqarlunga aningaasat amigaatigineqartut qujanartumik pissarsiarisimavakka, Pipaluk Lykke Løgstrup oqarpoq.

Assit 171-it unamminermut nassiunneqarsimasut ISI ØJE EYE-p nittartagaani takuneqarsinnaapput.