Inuusuttut piginnaatitaaffinnut isummersornerupput

Atugarissaarneq pillugu Danmarkimi Ilisimatusarfissuarmi SFI-mi misissuinermit nutaamit inerniliussat ilaat taamaappoq.

Taanna ilisimatuup Else Christensen suliaraa. Inuusuttullu suliniummi Nakuusami peqataasut ukiualunni uteqqiattumik apersortarpai.

- Inuusuttut isumaginninnikkut ajornartorsiutinik oqaluuserinnikkaagamik pimoorussisaqaat. Aamma isumaqarput  inuusuttut tusarneqarnissaat pingaartuusoq.

Ilisimatuup Else Christensenip nalunaarusiaani nutaarnerpaami inerniliussat isumalluarnartut ilaat taamaappoq.

Taassuma kalaallit inuusuttut 37-it ukiualunni malinnaaffigisimavai, isumaginninnermilu ajornartorsiutit pillugit isumaanik ukiumut ataasiarlugit apersortarlugit.

Inuusuttut isumaginninnermi ajornartorsiutit pillugit oqallinnissaq nuannarinerulersimavaat, isummernerallu allanngorsimavoq. maanna eqqarsartarput, isumaginninnikkut inissisimaffimmut inuit ataasiakkaat namminneq angisuumik akisussaaffeqartut. Ukiut pingasut matuma siornatigut inuusuttut akisarput, isumaginninnikkut ajornartorsiutit unitsinnissaannut politiit akiusissaanerusut. Maannali inuusuttut isumaqarput, nammineq akisussaanerpaallutik.

- Manna oqartarput, 'uagut inuusuttut aamma akisussaaqataavugut, uagullu nammineq qanoq iliuuseqarusuppugut", taamalu oqartarneq nuannersutut isigaara, Atugarissaarneq pillugu Ilisimatusarfissuarmi SFI-mi ilisimatooq Else Christensen oqaluttuarpoq. Taanna nunatsinni ukiorpassuarni ilisimatusarpoq