Inuit sisamat Appani ajunaarput
Umiatsiaq Ilulissat eqqaanni Appani kivilersoq Aasiaat Radioata Ilulissani politiinut ippassaq unnukkut qulingiluanut qiteqqutilersoq kalerrisaarutigaa.
Kalaallit Nunaanni Politiit tassunga atatillugu annaassiniarnermik aallartitsipput, qulimiguulik Appat eqqaannukartillugu, soorlu aamma umiatsiat allat umiarsuillu ujaasinermut peqataasut.
Umiatsiaq unnuap ingerlanerani ujaasisoqarnerani nassaarineqanngilaq. Politiilli maanna nalunaarutigaat inuit ajunaarsimasut sisamat tamaani ullumi ullaap tungaani nassaarineqarsimasut. Ajunaarsimasut suli kinaassusersineqarsinnaasimanngillat.
Inunnik allanik ajornartorsiortoqarsoralugu qulimiguullit umiatsiallu atorlugit suli ujaasisoqarpoq.