Inuit hunnorujulikkaat mittarfittaassaq alakkarpaat
Naak Nuummi mittarfittaassaq pilersaarutit malillugit, sapaatit akunneri arfineq marluk qaangiuppata aatsaat ammarneqartussaagaluartoq, innuttaasut alapernaakkusuttut mittarfittaassamut ullumikkut isertinneqarput.
Tassami Greenland Airportsip MT Højgaardillu, mittarfissap ammarnissaa sioqqullugu takusaaqqusillutik qaaqqusipput.
Soqutiginninnerlu annertuvoq. Innuttaasut hunnorujulikkaat terminaleqarfissaq alakkarterpaat.
Isertut ilaata Jens Josvasenip tamanna qiimmatsaatigaa.
- Aatsaavissuaq taama angitigisumut iserpunga. Nunatsinni imaakkami timmisartoqarfimmut iseraanni narluinnartarami, kisianni una quleriikkami. Taanna tupinnaqutigigamiuk quleriikkami. Taama angitigisumut isernikuunani tupinnarpoq.
Tupaallaatiginnittunut ilaavoq Pilunnguaq Mikaelsen, taassuma sanaartorneqartup qanoq angitigineranik tupaallaatiginnippoq:
- Anginaaqaara atulernissaalu qilanaarnarpoq. Kangerlussuaq aqqutigeqqaarnagu toqqaannaq aallartalernissaq erininaqaaq. Aasat tamaasa Danmarkiliartaratta atulernissaa qilanaarnaqaaq.
Terminali nutaaliaasoq
Aamma terminalimi atortut nutaajusut nuannaarutigineqaqaat, Air Greenlandimi pisortaq Jacob Nitter Sørensen oqarpoq.
Atortorissaarutimmi nutaaliaanerpaat nutaanerit atorneqalertussaapput.
-Scannerit nutaanerpaat nassatanut atortut nutaanerpaat aamma check-inernermi atortut nutaaliaanerusut, tamarmik mittarfimmi pitsaasumik ingerlatsinissamut pingaaruteqartut atulissapput, taanna oqarpoq.
Tamanna angalasunut pitsaanerusunik ajornannginnerusunillu misigisaqartitseqataassaaq, taanna oqarpoq:
-Ilimagivara sullitavut angalasullu, nutaarluinnarmik misigisaqarumaartut. Nutaarluinnarmik mittarfittaassaq nutaarluinnarnik atortorissaaruteqarpoq. Qaamaneruvoq, kusanarpoq, Kalaallit Nunaanniillu angalasunut aammali nunatsinnut angalasunut misigisassaqarluartitsiumaarpoq.
Naalakkersuisut malinnaasimapput
Aaqqissuussinermi politikerit arlallit takkupput. Ilaatigut naalakkersuisut siulittaasuat, Muté B. Egede, taannalu aaqqissuussinermut aggertunut oqalugiarpoq.
Ineqarnermut Attaveqaasersuutinullu Naalakkersuisoq, Hans Peter Poulsen, terminalit nutaat siullerpaamik takusimanngikkaluarlugit, taanna aamma aaqqissuussamik nuannaarutiginnippoq:
- Pissanganartorujussuuvoq aamma ineriartornera malinnaaffigiuaannaavipparput, kiisami naammassiartulerpoq. Ersarippoq suut sumiilernersut. Tassa naalakkersuisutut periarfissaqartarpungut sanaartorfimmut alakkaasinnaalluta, suliallu killiffianik oqaluttuarfigineqarluta. Massakkut isikkussavini atiartoraa takuneqarsinnaavoq, tamanna assut nuannerpoq, taanna oqarpoq.
Terminalissap juunip 17-iani ammarneqarnissaa naatsorsuutigineqarpoq, atlantiku qulaallugu timmisartorsuaq siulleq novembarip 28-ani, siullermeerluni Nuup mittarfittaavanut missaaq.
