Innarluutilinnut sapaatip-akunnerani angajoqqaajusut qitiutinneqassapput

Ukioq manna immikkut isiginiarneqassaaq siunissami qanoq iliorluta angajoqqaat innarluutilinnik meerallit tapersersornissaat pikkorinnerulerfigisinnaaneripput.

Innarluutillit sapaatip akunneqartinneqarnerannut qulequtaritinneqartoq  - siorna ataatsimeersuarnermit aallaaveqarpoq tassani saqqummiunneqarpoq oqilisaanneqarnissamik ilaqutariinnillu oqilisaassisartussanik pisariaqartitsineq tassaasut, kattuffiup INOOQAT-p meeqqat ineriartornermikkut akornutillit angajoqqaavinik oqaloqateqarnerani oqallisigineqakulanerpaasartut ilaat.

Innarluutip suunera apeqqutaatillugu, angajoqqaat innarluutilimmik meerallit ullut unnuallu tamarluinnaasa meeqqaminnut atorsinnaasarpaat.

Tamanna qasunartorujussuuvoq, misissuinerillumi takutippaat angajoqqaat innarluutilimmik meerallit imminnut qimannissaat ilimanaateqarnerusartoq  ataatsimeersuarnermi saqqummiunneqarpoq.

Angajoqqaat qasuersaalaarnissamut periarfissaqartinnissaat pingaaruteqarpoq
Ilaqutariinnermut Inatsisinillu Atuutsitsinermut Naalakkersuisup Martha Lund Olsenip pingaartippaa, angajoqqaat innarluutilimmik meerallit qasuersaalaarnissamut periarfissaqartarnissaat pingaaruteqartuusoq. Ilaatigut pissutigalugu ilaqutariit allanik meerartaqarsinnaasarmata, piffissap ilaani immikkut maluginiarneqarnissaminnik pisariaqartitsisinnaasunik.

Taamaammat Martha Lund Olsen aamma IPIS aalajangerput 2014-imi sapaatip akunnerani 41-mi, angajoqqaat innarluutilimmik meerallit inuiaqatigiinnit avatangiisiminnit tapersersorneqarnissaminnik pisariaqartitsinerat sammineqassasoq.

Innarluutillit pillugit sapaatip akunnerani qulequtaasumut atatillugu ingerlanniakkanut sammisanullu tapiissutinik  IPIS-imut qinnuteqartoqarsinnaavoq.

Qinnuteqaatit IPIS-imut tunniunneqassapput kingusinnerpaamik septembarip 12-iani 2014.