Inissiisarfinnut utaqqisut ikileriarsimapput
Nalunaarummi atuarneqarsinnaavoq pineqaatissinneqarsimasut inissiisarfiannut, tassalu isertitsivinnut utaqqisut ikileriangaatsiarsimanerat.
Kangerlussuarmi utaqqiisaasumik inissiisarfik ukioq manna marsimi matuneqartoq utaqqisut ikileriangaatsiarsimanerannut peqqutaavoq.
Pinerluttunut isumaginnittut ukiumoortumik nalunaarutaanni maluginiagassaanngitsuunngilaq inissiisarfinnut utaqqisut siorna ikileriangaatsiarsimanerat.
Kangerlussuarmi utaqqiisaasumik inissiisarfiusimasoq, 30-nut inissalik, utaqqisut ikileriangaatsiarsimanerannut peqqutaavoq. Inissiisarfik siorna ukioq naallugu ammatinneqarsimavoq, ukioq mannali marsimi matuneqarluni.
Pineqaatissinneqarsimasut inissiisarfinnut utaqqisut siorna ukioq aallartimmat 251-iusimapput, ukioq naammat 56-inut ikileriarsimallutik.
Pinerluttunik isumaginnittut nuna tamakkerlugu arfineq-marlunni siorna inissiisarfeqarsimapput, sumiiffiit pineqartut tassapput: Ilulissat, Aasiaat, Sisimiut, Nuuk, Qaqortoq, Tasiilaq aamma Kangerlussuaq, taakku katillugit 194-inik tigusisinnaasimagaluarput. Kangerlussuarmiittorli maanna matuneqareermat inissiisarfiit arfinillit kiserngorupput.
Inissat taakku 194-it siorna 548-nit atorneqarsimapput, taakkulu tassaasimapput tigusarineqarsimasut, tigummigallagassanngortinneqarsimasut pineqaatissinneqarsimasullu.
Inissiisarfik Qaqortumiittoq kisiartaalluni amerlavallaanik tigummisaqarsimavoq. Ilulissani ukioq naallugu ulikkaaqqasimapput, sippuisoqarsimananili.
Inissiisarfimmiittoq ataaseq siorna imminorsimavoq, allalu ataaseq imminoriarsimalluni.
Inissiisarfimmiittut 82 procentii inissiisarfimmi siorna sulisimapput, sinneri inissiisarfiup avataani sulisimapput.
Nalunaarummi aamma atuarneqarsinnaavoq inissiisarfimmiittut 26-t qimaagaluarsimasut.
Pinerluttunik isumaginnittut, tassalu kriminalforsorgi katillugit 115-inik sulisoqarpoq, anstaltbetjentit 13-it tunngaviusumik ilinniakkaminnik siorna naammassinnipput.
