Inissiani attartortut qulit sakkortuumik ikuallattoqarnerani eqqorneqarput
Inissiani najugaqartut akunnittarfinnut inissinneqarput. Akunnittarfinniinerat marlunngornermut sivitsorneqarpoq, inissiat ajoqersimanerat politiinit nalilersorneqassammata.
Inissiani qulini najugaqartut inissiaatileqatigiiffimmit A/S INI-mit maanna aggersarneqarput oqaloqatigineqarnissaannut, taakkualu tassugu nalunaaqutaq ataatsimut qanoq pisoqarnissamik paasissutissiiffigineqassapput.
Najugaqartut oqaloqatigineqarneranni paasiniarneqarput, inissiani attartut sillimmasersimanersut sillimasersimannginnersulluunniit, inissiaatileqatigiiffimmi A/S INI-mi paasissutissiinermut pisortaq Else Løvstrøm KNR-imut oqarpoq.
Ikuallattoqarsimanermik paasiniaasartut Danmarkimeersut Nuummut tikissapput, taakkualu naliliinerat aallaavigalugu inissiani najugaqartut inissianut utersinnaanersut paasineqassaaq.
Nuummi Sermersuup politiivinit nalunaarutigineqarpoq, ikuallattoqarsimanermik paasiniaasartut toqusoqarsimatillugu misissuisartut Danmarkimeersut sapaatip akunnerata ingerlanerani Nuummut tikissasut, paasissutissanillu nutaanik tallimanngorpat politiit tunniussisinnaanissaartik naatsorsuutigaat.
