INI akitsuiniarunnaarpoq

Kiassarnermut akiliutaagallartartut qaffarujussuarnissaat pillugu akerliusoqarnera pillugu inissiaatileqatigiffiik 50 procentimik juulip aallaqqaataaniit akitsuiniaraluarnerminik unitsitsivoq.
Allattoq Noah Mølgaard
juunip 11-at 2012 08:56

Taamaattoq kiassarnermut akiliuteqariaaseq nutaaliaanerusoq aggustip aallaqaataani atulersinniarneqarpoq. Inimiilli ilimasaarutigineqarpoq akiligassarujussuarmik aappaagu takkuttoqarsinnaanera ukioq qiianarlunilu takissappat.

- Atuisorpassuit eqqornerlunneqartussanngortut tusaaniarsimavagut. Taamaattumik juulip aallaqqaataaniit 50 procentimik qaffaanata aggustip aallaqqaataani 10-20 procentimik qaffaassaagut. Taava siunissami kiassarnermut akiliutaagallartut ukiut affakkaarlugit naleqqussarneqartassapput siullermillu ukiortaami taamaasiussaagut. Neriuutigaarput maanna iliuuseqarnitsigut naammagittaaliortorpassuit iluaqusiiffigilaarsinnaallugit. Paasisinnaalluarpakkami pissakinnerit naammagittaalliormata, Inimi aqutsinermut pisortaagallartoq Birte Kielsen oqarpoq, ilanngullugulu oqaluttuaralugu Inip kiassaateqarfinnit 138-it kiassarnermik pissarsisarlutik.

Inissianik attartortut ilimagisinnaavaat akiliutaagallartut qaffakkiartuaarnissaat aammalu periarfissaqarpoq INIp attavigineratigut akiliutaagallartut naleqqussarnissaannut.

- Uatsinnut pingaarpoq atuisut qisuariarnerisigut INIp isummani allanngortimmagu. Immikkoortoqarfinni ataasiakkaaniit naatsorsuutit amigaataasimapput. Maanna INI piffissaqalerpoq misissueqqissaarnissaminut pissutsillu paasilluarlugit. Taava takussavarput siunissami taama ajortigiinnassanersoq, Ujoorsi Therkildsen aamma ineqartut maalaaruteqartarfianni Namminersorlutik Oqartussat pilersitaanni ilaasortaasoq oqarpoq.