Ineqarnermut tapiissutit angajoqqaat pisinerat matussusertarpaat
Tassa, inissiamik mikinerusumik pisinissamut taarsigassarseriarluni inissiaq ernermut panimmulluunniit attartortinneqartarpoq, angajoqqaat pitsissinerattut tamanna taaneqartarluni.
Qaammammut akiliut taava qaffasissorujussuanngortinneqartarpoq, meeraasullu ilaminiinnai akileriarlugit, sinneri ineqarnermut tapiissutinit matussuserneqartarlutik. Illunik tuniniaasartup ineqarnermut tapiissutit qanoq pissarsiarineqarsinnaanerannik ilitsersuisuusiorsimanerat takoreerlugillu, Atassutip Inatsisartunut ilaasortaatitaata Knud Kristiansenip periuseq saqqummiuppaa:
- Tamassuma aningaasalersorneqarnera oqimaaqatigiissinneqarsinnaavoq inuusuttoq ineqarnermut tapiissummik pisinnaappat. Ineqarnermut tapiissut qaammammut 5000-it koruunit missaanniippoq, inuusuttullu namminneq annikitsuararsuinnarmik akiliisassapput. Angajoqqaat qaammammut tapiissutaat annikitsuupput 300-t aamma 500-t koruunit akornanniillutik, illunik tuniniaasartup piseqqusaarutaani ilaatigut allassimavoq.
Atassut, Inatsisartuni qaammatip massuma naajartulernerani oqaluuserineqartussamik taamaammat aalajangiivigisassatut siunnersuuteqarpoq, assersuutigalugu inissiamik minnerusumut ineqarnermut tapiissutit ukiumut amerlanerpaamik 18.000-it koruuniunissaat siunnersuutigineqarluni. Ullumikkut 60.000-it koruunit tikillugit tapiissuteqartoqarsinnaasoq, AG-p ullumi allaaseraa.
- Taamaattoqarnera sivisuumik ilisimasimavarput, kisitsisinilli piviusunik amigaateqarsimalluta. Maanna tamakkua pissarsiarisimavavut, isumalluarpugullu aalajangiivigisassatut siunnersuut akuerineqassasoq, Atassut sinnerlugu Inatsisartuni ilaasortq, Knud Kristiansen, AG-mut oqarpoq.
