Inatsisartuni akunnerup apeqquteqarfiup nutaamik ilusilerneqarnera iluatsilluarpoq
- Soorunami maleruagassat nutaat partiit siulittaasuinit, oqaaseqartartunit Naalakkersuisunullu ilaasortanit sungiunniarneqalaaqqaassapput, maannangaarli takusinnaalereerparput periuseq nutaaq oqallinnerup pitsaanerulerlunilu sammineqartunut tunnganerulerneranik nassataqassasoq, tamannarpiarlumi nutaamik aaqqissuussisoqarnerani anguniakkat pingaarnersaraat. Atuisut aaqqissuussineq nutaaq pillugu iluarisimaarinnillutik oqariartuutaannik arlalinnik tigusaqareerpugut, tamannalumi Inatsisartut uangalu soorunami nuannaarutigaarput, Lars-Emil Johansen oqarpoq.
Maleruagassat nutaat malillugit pingasunngornerit allortarlugit illuatungiliuttuni partiit siuttui imaluunniit partiip siulittaasua Inatsisartunut ilaasortaanngippat illuatungiliuttut oqaaseqartartui kisimik Naalakkersuisut siulittaasuannut apeqquteqarsinnaapput. Tamatumani oqaaseqartartut tamarmik minutsinik aqqaneq marlunni oqaaseqarsinnaapput.
Oqaaseqartartut nalinginnaasumik tulleriinnilersuineq malillugu, tassa Inatsisartunut ilaasortaqaqqortussuseq malillugu oqaaseqartassapput. Minutsit aqqaneq marluk ingerlanerini minutsit marluk tikillugit sivisussusilimmik qasseriarluniluunniit apeqquteqartoqarsinnaavoq aammalu minutsit marluk iluini akissuteqartoqartassalluni.
Pingasunngornerit allortarlugit akunneq apeqquteqarfik pisarnertut ingerlanneqartassaaq, tamatumanili allaanerussutaalluni partiini Naalakkersuisuutitaqartuni ilaasortat apeqquteqarnissamut periarfissinneqannginnissaat Siulittaasoqarfimmit kaammattuutigineqarmat. Ilaasortat taakku Naalakkersuisut aqqutigalugit paasissutissanik ajornannginnerusumik pissarsiniarsinnaanerisa ilimagineqarnera tamatumunnga soorunami pissutaavoq.
- Taamatut iliuuseqarneq Inatsisartuni Inatsisartullu oqalliseriaasiannik ingerlaavartumik inerisaanerup nutarterinerullu ilaatut isigaara, Lars-Emil Johansen oqarpoq, ilanngullugu oqaatigaa: - Neriuppunga ukiuni aggersuni iliuutsinik taamaattunik Siulittaasoqarfik saqqummiussisinnaajumaartoq.
