Inatsisartoqarfik sakkortuumik isornartorsiorneqartoq

Aqqaluup aneerasaartarfia quppersakkami piukkunnartutut saqqummiunneqarpoq. Inissiinissamullu periarfissat allat marluk piukkunnanngitsutut taaneqarlutik.

Isumaqatissarsiortutut Inatsisartoqarfiup paasissutissanik agguaanera inuit attaveqaqatigiittarfianni isornartorsiorneqangaatsiarpoq.

Aqqaluup Aneerasaartarfia pillugu paasititsiniaaneq Inatsisartut nittartagaanni atuarneqarsinnaavoq

Inatsisartunut ilaasortap Naaja Nathanielsenip quppersagaq innuttaasunut sunniiniutitut taavaa.

Lars Emil Johansenilli taamatut isornartorsiorneqarneq pissutissaqanngitsutut isigaa.

- Uagut qinnuteqaaterput taasissutigineqartussaammat pissusissamisoorsorivara paasissutissiinissarput. Borgmesteri sulisuilu ataatsimeeqatigisarpagut, aamma aningaasaqarnermut ataatsimiitsitaliaq ataatsimeeqatiginikuuarput. Kissaatigisagut tamaasa nalunngilaat, Lars Emil Johansen KNR-imut oqarpoq.   

Taassuma pissusissamisoortutut isigaa Inatsisartoqarfimmiit paasissutissiisoqarnissaa Inatsisartoqarfiup kissaatigimmagu nunaminertamut pineqartumut ataatsimiittarfissap inissinneqarnissaa.

IA-mit isornartorsiorneqarpoq
Inuit Ataqatigiit Inatsisartunut ilaasortaatitaata Naaja Nathanielsenip Inatsisartoqarfiup Inatsisartut avaqqutiinnarlugit quppersakkamik agguaasimanera sakkortuumik isornartorsiorpaa.
 
- Inatsisartut ataatsimiittarfissaata sanaartorneqarnissaata pilersaarusiornera, Inatsisartunut taamaallaat taasissutigitinneqarpoq. Tamannalu amerlanerussuteqartut akuersissutigaat. Ataatsimiittarfissalli sumi inissisimanissaa pillugu taasitinneqanngilagut. Taamaattumik Aqqaluup Aneerasaartarfianiitinneqarnissaanik aalajangiisoqarnera ima paasineqassanngilaq, Inatsisartut tamarmiullutik tamanna aalajangigarigaat, Naaja Nathanielsen oqarpoq.

Taassuma Inatsisartoqarfiup quppersakkamik Nuummi innuttaasunut agguaasimanera, innuttaasunik sunniiniarnertut taavaa.

- Quppersakkami titartarneqarsimasoq innuttaasunik tiguaaniarnertut oqaatigineqarsinnaavoq. Kisianni isumaqarpunga innuttaasut tamanna akuerinavianngikkaat, Naaja Nathanielsen oqarpoq.

Lars Emil Johansenilli paasisinnaanngilaa taamatut oqartoqarnera. Nammineq oqarpoq qoqassiiniartoqanngitsoq.   

- Ammalluinnartumik oqaatigaarput periarfissat pingasut aajuku, taakkua akornanni uagut toqqarparput Aqqaluup Aneerasaartarfia, Lars Emil Johansen isornartorsiorneqarneq pillugu oqarpoq.

AAMMA ATUARUK Inatsisartut ataatsimiittarfittaassaat pillugu Asii internettikkut taasisitsilerpoq

Quppersakkami allaqqavoq Kommuneqarfik Sermersooq Inatsisartut ataatsimiittarfissaat nutaaq sumiissinnaaneranik periarfissanik pingasunik tikkuaasimasoq, tamannalu Kommuneqarfik Sermersuumit ilumuunngitsoq oqaatigineqarpoq.

Kommuneqarfik Sermersuup ippassaq nalunaarutigaa kommuni sumiiffiit pingasut pineqartut toqqagarinagit, Inatsisartoqarfiulli toqqagarigai.

Tamannalu Inatsisartut siulittaasuata eqqumiigalugu oqaatigaa.
 
Lars Emilip paatsuungassutigaa Kommuneqarfik Sermersooq sumiiffiit pingasut pineqartut tikkuaaqataaffigisimanagit nalunaaruteqarnera.

- Eqqunngilaq, novembariminngaanniilli uagut sulisutta kommunillu sulisuisa misissuataarnikuuaat periarfissat suunersut. Siullermik sumiiffit periarfissat qulingiluaapput, taakkunanilu pingasut toqqarneqarput. Taakkunanilu pingasuni uagut Aqqaluup Aneerasaartarfia toqqarparput, Lars Emil Johansen naggasiivoq.