Imminortoqarsimatillugu ikiuinissaq ajornakusoorpoq

Kujataani imminut toquttartut amerleriarujussuarsimapput. Ukioq manna Qaqortumiinnaq arfineq-pingasut imminut toqussimapput. Qanigisaasullu tamanna qaangeruminaatsittarpaat.
Allattoq Dorthea Johansen
aggustip 01-at 2014 06:00

 Tarnip pissusaanillu ikiortinnissaq ajornakusoorpoq, kujataanimi tarnip pisussaanik ilisimasalik ataasiinnaagami.

-Imminut toquttarneq sunniuteqartorujussuusarpoq. Ilaquttat, ikinngutit, nalunngisallu sunnerneqartarput. Imminut toquttoqartillugu eqqorneqartut amerlasaqaat.

- Kommune Kujallermi tarnip pissusaanik ilisimasalik ataasiinnaavoq, taassumalu suliassaq tamaat kisimi kivissinnanangilaa. Eqqorneqartullu amerlasoorujussuit tamaavimmik ikiorsinnaanngilai.

- Allatut ajornartumik eqqorneqartut ilai nammineertariaqartarput, naak oqaloqateqarnissamik pisariaqartitsigaluarlutik, Qaqortumi ilaqutariinnut sullissivimmi aqutsisoq Cecile Jeremiassen oqarpoq.

Taassuma aamma eqqaavaa tarnip pissusaanik ilisimasalik ataatsiinnaammat qanigisaasut eqqugaasut ikiorneqarnissaannut periarfissat Kommuni Kujalliup akunnattoorfigigai.

Oqaloqateqarnissaq tarnimut katsorsaataasarpoq, katsorsaaniarnerli ajornakusoorpoq
Annaasaqarsimagaanni oqaloqateqartarnissaq pingaaruteqartoq pinaveersaartitsinermi siunnersortip Lars Knudsenip oqaatigaa.

- Oqartoqartarpoq imminut toquttarneq ilaqutariinnut sakkortunerpaasartoq. Arlariit ilaqutariit sullissivianni oqaloqateqartarput. Qanigisaq imminut toqussimagaangat qaangeruminaatsorujussuusinnaasarpoq, taamaammat pisariaqarnerpaavoq oqaloqateqartarnissaq, Lars Knudsen oqarpoq.

Imminut toqunneq pissusissamisuunngitsoq paasissallugu pingaaruteqartoq Cecilep oqaatigaa.

Katsorsarneqarsinnaanngitsumik napparsimasoqartillugu ilaqutaasut annaasaqarnissaminnut tarnikkut piareersartarput. Taamaammat imminut toquttoqaraangat tassanngaannartuusarpoq, ilimagisaanerlu ajorluni. Taamaattoqaraangat artornartorujussuusartoq, Cecile Jeremiassenip ilisimalluarpaa.

AAMMA ATUARUK Kujataani imminut toquttorpassuit

-Ilaqutariit tuparujussuartarput, apeqquterpassuillu sarsualersarlutik. Imminullu pisuuteqqajaasoqartarpoq. Taamaattumik imminut toquttoqarsimagaangat qanigisaasunut qaangeruminaatsorujussuusarpoq, Qaqortumi ilaqutariinnut sullissivimmi aqutsisoq Cecile Jeremiassen oqarpoq.

Kommune Kujallermi pinaveersaartitsinermik suliallit augustimi pinaveersaartitsillutik innuttaasunik ataatsimiisitsisaqattaassapput.