Imermik puilasumeersumik tunisassiorfik nunap sisoorneranit aamma eqqugaavoq

Qeqertarsuarmi nunap sisoornerata kingorna illoqarfimmi imermik pilersuineq eqqorneqarpoq. Qeqertarsuarmi suliffeqarfiit anginerit ilaat imermik tunisassiortoq 938 aamma eqqugaavoq.
Allattoq Jaaku Lyberth
aggustip 19-at 2014 04:53

- Ujaqqat nunalu annertooq sisoorput, Martin Widmer KNR-imut oqaluttuarpoq. Martin Wieder imermik tunisassiorfiup 938-p Schweizimi tunisassiornermik ingerlatsisorivaa.

- Sulisutsinnit oqaluttuunneqarpugut erngup aqqutaa tunisassiorfimmut ingerlasoq nunap sisoorneratigut aserorneqarsimasoq. Neriuppugut sillimmasiisarfiup akilerumaaraa, Martine Wiedmer oqarpoq.

Ullut arlaqartut siallerujussuarneratigut nuna annertooq sisoormat inunnik ajoqusertoqanngitsoq politiinit oqaatigineqarpoq.
 
Napasunnguit eqqaanni Kuussuarmi ikaartarfik aamma qarsunneqarsimavoq.

Qeqertarsuarmi erngup aqqutai marluk atorneqarput taakkulu 50 meterinik akunneqarlutik.

AAMMA ATUARUK VIDEO Qeqertarsuarmi nunap sisoorneratigut erngup aqqutai kittoraatsitertut

Erngup aqqutaata aappaa imermik tunisassiorfiup 938-p atorpaa aappaalu Nukissiorfiup. Erngup aqqutaasa  aserfallatsaalineqarnissaat Nukissiorfiit isumagisassaraat, tamarmillu ajoqersisimapput atorneqarsinnaajunnaarlutik.

938-p erngup tunisassiarineqartup puilasumeersuunera ilisimaneqaatigaa

Tunisassiorfiup tuniniaanermik pisortaata ajoqusernerup annertussusia nammineerluni suli takunngilaa. Taamaattumillu nunap sisoorneratigut suliffeqarfik aningaasatigut qanoq eqqorneqassanersoq pillugu oqaaseqarnissani tunuarsimaarfigalugu.

Imeqarfiusimasumit imermik pilersuineq utaqqiisaasumik Nukissiorfimmit  aallartinneqarpoq, taamaakkaluartoq imeq qalaateqqaarlugu atorneqartassaaq.