Ilulissani mittarfimmik takinermik sanarusuttut

Qaasuitsup Kommuniani kommunalbestyrelsip siorna aalajangerpaa Ilulissani 2800 meterinik takitigisumik mittarfiliornissamut kommuunip misissuisitsinini aallunnerussagaa.

Kommuunillu pilersaarutaa, nunanit allanit aningaasaliiffigineqartussaq, Naalakkersuisunut saqqummiunneqareerluni tunngaviusumik akuersisussanut, tassa Inatsisartunut, ingerlateqqinneqarsimalerpoq:

- Taanna suliassaq ukioq ataaseq sinnilaarlugu ingerlanneqarpoq. Aamma siorna siunnersortit assigiinngitsut suleqatigalugit, avataaninngaanniit aningaasalersuisinnaasut oqaloqatigineqaqattaarput, Qaasuitsup Kommuniata borgmesteria, Ole Dorph, suliniummut neriuuteqarluartoq oqarpoq.

Kommuunip pilersaarutigaa Ilulissani mittarfiup pioreersup eqqaatigut mittarfimmik nutaamik 2800 meterinik takisissuseqartumik sanasoqassasoq:

- Tassalu taassuma kingunerissuaa ukua timmisartorsuit Nunatsinnut tikittartut, soorlu Air Greenlandip timmisartua Norsaq allallu taamatupajaaq isikkullit, tassa maanga toqqaannartumik tikissinnaalissapput. Aammalu tassa tamakkua ullumikkut angissusaapput silarsuarmi sumiluunniit takornarissat allallu nikinniaraangamik atortagaat. Massakkullu suliassaq naalakkersuisoqarfimmiippoq - Inatsisartuni. Tassanilu isummerfigineqartussaavoq piffissami aggersumi. Una piviusunngortinneqassanersoq imaluunniit qanoq iliuuseqarfigineqassanersoq, Ole Dorph oqarpoq.

Pilersaarutaavoq nutaamik piginneqatigiiffimmik pilersitsinikkut, mittarfissaq nutaaq piginneqatigiiffissap pigisarilissagaa:

- Tassa aningaasaliisinnaasut, Danmarkimi nunanilu allani, piumasarisimavaat Nunatsinni politikkikkut uuma pilersaarutip naliliiffigineqarnissaata utaqqinissaa. Tassa massakkut taanna kisimi utaqqisaavoq. Aammalu taassuma oqaluuserineqarnissaa, isummerfigineqarnissaa utaqqivarput pissangalluta. Neriussuungalu uuma piviusunngortinneqarsinnaanissaa pimoorullugu sulissutigineqalissasoq, Ole Dorph oqarpoq.