Ilulissani atuartut naammagittaalliornerat tusaaneqarpoq

Ilulissani Atuarfik Mathias Storchimi 10.A-mi atuartut ikioqqullutik naammagittaalliornerisa kinguneranik, piumasaqaataat akuerineqarpoq. Oqaatsinut tunngasuni allattariarsorluni misilitsittussaanerminnut atatillugu, qarasaasianik atuisinnaannginnissaminnik atuartut nalunaarfigineqaramik, ikioqqullutik naammagittaalliorput, taamatummi suliaqartarnerminni aamma sungiusaatigalugu misilitsittarnerminni, qarasaasiamik atuineq sungiusimareeramikku.
Allattoq Elisa Isaksen
apriilip 16-at 2014 17:08

Qarasaasianik atuisinnaannginnerannut Atuarfik Mathias Storchip nutaamik sanaartorneqarneranut atatillugu teknikkikkut periarfissaqannginnera utoqqatsissutigineqaraluarpoq.

Tamannali atuartut akuerisinnaannginnamikku, atuarfimmi oqartussat aalajangiinerat tamanut ammasumik naammagittaalliuutigaat.

Naammagittaalliornerallu ualeq manna tusaaneqarpoq.

Kulturimut atuartitaanermullu pisortap Hans Eriksenip tusagassiuutinut nalunaaruteqarluni oqaatigaa, atuartut naammagittaalliornerat tunngavigalugu, atuartut inaarutaasumik misilitsinnerminni qarasaasiamik atuisinnaanissaat aalajangiunneqartoq.

Inaarutaasumik misilitsinnerit Piareersarfimmi "Sillimmi" pisussanngortinnerisigut, qarasaasianik atuisoqarsinnaalersoq, pisortaq Hans Eriksen allappoq.

Atuartut taamaalillutik eqqissillutik inaarutaasumik misilitsinnissaminnut piareersarsinnaanngorput.

Immaqa aamma eqqunngitsumik pineqartutut misigisimagaanni naammagittaalliornerup iluaqutaasinnaanera nuannaarutigisinnaavaat.
      

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq