Iluliarmiut Fredericiamiullu paarlaasseqatigiittarnerat persuarsiutigineqarpoq

Atuartut 23-t Ilulissaneersut ullumi marlunngornermi Danmarkimut apuutissapput.
Allattoq Elisa Isaksen
apriilip 22-at 2014 06:26

Atuartut taakku Ilulissat ukiorpassuarni ikinngutaannut Fredericiamut tikeraartussat siulliussapput.

Illoqarfiit taakku suleqatigiinnerat ukiormanna ukiunik 45-nngortorsiorlugu nalliussineqarpoq. Tamatumunnga atatillugu borgmester Ole Dorph siuttoralugu Qaasuitsup Kommuniani atuartitaanermut allaffeqarfimmi atorfillit malunnartitsisoqarnerani peqataassapput.

Meeqqat 23-t Ilulissaneersut Danmarkimiinnertik aallarnerlugu Vejle Fjordimi ulluni sisamani tallimaniluunniit tammaarsimaartarfimmi Hvidbjergimiissapput,

Meeqqat atuartut allat qulit sapaatip akunnerata tulliani aamma Danmarkiliassapput, atuartullu katillugit 33-usut tammaarsimaartarfimmi Hvidbjergimeereerunik angajoqqaarsiassaminnut Fredericiamut, Middelfartimut Vejlemullu agguataarneqassallutik.

- Meeqqat taamaalillutik qallunaani ilaqutariinni ulluinnarni inuunerup misiginissaanut periarfissaqassapput, Fredericiap Kommuniani Nunatsinnut tunngasunut ataatsimiititaliami siulittaasoq John Bech Hansen oqarpoq.

- Atuaqatigiit tikeraartorisartakkatta ikinnerpaartaat tikeraartorissavavut, atuartut ukioqatigiit ikittuinnaanerat tamatumunnga patsisaavoq, John Bech Hansen oqarpoq, meeqqallu angajoqqaarsiassarsiornerat ajornartorsiutaasimanngitsoq oqaatigalugu.

Meeqqat juuni aallartilaarpat Ilulissanut utissapput, Danmarkimiinnerallu naggaserlugu meeqqanut angajoqqaarsiaannullu angisuumik aaqqissuussisoqassaaq, Ilulissaneersullu borgmester Ole Dorph siuttoralugu peqataassallutik, John Bech Hansen aviisimut Fredericia Dagbladimut taama naggasiivoq.