Illoqarfimmut aliasuffiusumut ikiuuttussat aggerput

Qaasuitsup Kommunia Uummannamut umiatsiamik sapaatiummat alianartumik ajunaarfiusumut ikiuukkiartortussanik ullumi allartitsissaaq.
Allattoq Jens Thorin
juulip 29-at 2014 07:25

Pisoq tamanut sunnerneqaataavoq.

- Tarnip pissusaanik ilinniagalimmik taavalu isumaginninnermi siunnersortimik, aamma Ilaqutariit Illuanni pisortaasumik, Uummannaliartitsissaagut. Ikiuukkasuariartortullu  ilinniarsimasuunissaat uagutsinnut pingaaruteqarpoq, Qaasuitsup Kommuniani Meeqqanut, inuusuttunut, ilaqutariinnut pinaveersaartitsinermullu immikkoortoqarfimmi pisortaq Johanne Olsen taama oqarpoq.

Umiatsiamik ajunaarneq inuit pingasut 67-iniit 77-inut ukiullit inuunerannik naleqartoq, Uummannami najugalippassuit sunnerneqaatigigaat, Johanne Olsen oqarpoq.

AAMMA ATUARUK Uummannami alianartumik ipilluni ajunaartoqarpoq

Ajunaartut utoqqaammata inuppassuit eqqugaapput, taamaammallu  illoqarfimmiut tamarmik aliasuttut, Qaasuitsup Kommunianeersoq oqaluttuarpoq.

Taanna oqaluttuarpoq, ajunaarneq inuppassuit isiginnaarsimagaat, aalisartullu arlallit ajunaarfimmut pillutik ikiuussimallutik.

- Uani pisumi alianartumi inuppassuit eqqugaapput, utoqqaat ilaqutarpassuallit ajunaarmata. Inuppassuillumi aamma attortissimapput. Tassalu illoqarfimmiut tamarmik aliasupput, immikkoortoqarfimmi pisortaq oqarpoq.

AAMMA ATUARUK Aalisartut annaassiniaqataasut Uummannami politiinit qutsavigineqarput

Taamaammat ajornartoornermi upalungaarsimasut suliassaat angeqaaq.

- Ilaqutaasut saniatigut aamma inuppassuit ajunaarnermik isiginnaarput, aalisartut amerlasuut ajunaarfimmut pillutik ajutoortunik immamiit qallueqataallutik. Taamaammat ikiuukkiartortut, ajunaarnermut malinnaasimasunut, ajunaartunullu ilaqutaasunut attaveqassapput, Johanne Olsen oqarpoq.

Namminersorlutik Oqartussanut ikioqqusut

Ajunaarnermit toqqaannartumik toqqaannanngitsumillu sunnerneqartut amerlammata, Qaasuitsup Kommunia ikioqquvoq.

- Illoqarfimmiut tamarmik eqqugaapput. Taamaattumik uagut ikiuiartortitatta saniatigut aamma Namminersorlutik Oqartussat saaffigivavut, taakkua ikiuussinnaannginnersut paasiniarlugit. Tarnip pissusaanik ilisimasallit pigimmatigit neriuppunga arlaatigut aamma ikiorsinnaassagaatigut. Pisoq una imaannaanngitsoq annertummat, Qaasuitsup Kommuniani Meeqqanut, inuusuttunut, ilaqutariinnut pinaveersaartitsinermullu immikkoortoqarfimmi pisortaq Johanne Olsen taama oqarpoq.