Ilisimatusarfimmi pisortaq: Lars-Emil allatut iliorsinnaagaluarpoq

Inatsisartut ataatsimiittarfissaata sumi inissisimanissaa pillugu siunnersuummik, Lars-Emil Johansen quppersakkamik tamanut agguaassinera, ingerlatsinissamut pisinnaatitaaffimmik unioqqutitsisimanersoq takujuminaappoq.
aggustip 22-at 2014 04:19

Ilisimatusarfimmi inuiaqatigiit pillugit immikkut ilisimatusarfimmi pisortaq, Maria Ackrén taama oqarpoq.

Taassuma ilanngullugu oqaatigaa, Inatsisartut ataatsimiittarfissaata sumiinnissaa pillugu, Lars-Emil Johansen politikeritut pisinnaatitaaffeqarmat siunnersuuteqarnissaminut. Taamaattorli Maria Ackrénip aamma oqaatigaa, Inatsisartut siulittaasuatut siunnersuuteqarnera tupigineqarsinnaaasoq.

Inatsisartut ataatsimiittarfissaata sumiinnissaa pillugu Lars-Emil Johansen quppersagaaqqamik tamanut agguaassinnginnermini, immikkut ittumik siunnersuuteqarsimasinnaagaluartoq, Maria Ackrén oqarpoq nangillunilu oqaatigalugu, tamanna Inatsisartunut oqallisigitinnissaa pingaaruteqarmat aamma pingaaruteqarluni tamassuma inuiaqatigiinnut tusarniarneqarnissaa.

- Ataatsimiittarfissap pilersaarusiornera allatut suliarineqarsinnaagaluarpoq, soorlu inuiaqatigiinnut tusarniaassutigineqaqqaarluni imaluunniit suliaq aallartivitsinnagu inuiaqatigiit tamaasa paasissutissinneqaqqaarlutit, Maria Ackrén oqarpoq.

Lars-Emil Johansenip siunnersuummut aningaasat 3 million koruunit atugai pillugit, Inuit Ataqatigiit sinnerlugit Inatsisartunut ilaasortamit, Naaja Nathanielsenimit isornartorsiorneqarpoq. Tamanna pillugu Lars-Emil Johansen oqarpoq, aningaasat Inatsisartunit tapiiffigineqarmata, tamanna Naaja Nathanielsen eqqaamasariaqaraluraa.

- Quppersagaq taanna Inatsairtunit akilerneqarpoq. Tassa illorsuassaq taanna siorna ukiakkut aalajangerneqarmat aningaasat 3 million koruunit aningaasaliissutigineqarlutik, tassalu taakkutuaapput aningaasanut inatsimmit maannamut aningaasartuutaasussat, Lars-Emil Johansen oqarpoq.

Taassuma taama iliornera, ingerlatsinissamut pisinnaatitaaffimmik unioqqutitsisinerusnersoq takujuminaappoq, Maria Ackrén oqarpoq.

- Inatsisinik unioqqutitsisimasutut taassallu oqarsinnaanngilanga, taamaallaat oqaatigiinnarsinnaavara tupigigakku paasititsiniaanermut taama isikkulimmut inuiaqatigiit aningaasaataat atorneqarsinnaammata.

Maria Ackrénilli ilanngullugu oqaatigaa, Lars-Emil Johansen politikerisut pisinnaatitaaffeqamat, sunilluunniit siunnersuuteqarnissaminut aamma Inatsisartut ataatsimiittarfissaata sumii inissisimanissa pillugu. Maria Ackrénilli tupigaa, Inatsisartut siulittaasoqarfia Inatsisartunut ilaasortat peqataatinnagit siunnersuuteqarsimammata.

- Lars-Emil Johansen politikerisut sunilluunniit siunnersuuteqarnissaminut pisinnaatitaafffeqarpoq, apeqquserneqarsinnaasutuarli tassaavoq, Inatsisartut siulittaasutut taamaattunik siunnersuuteqarsinnaanera.

Ilisimatusarfimmi inuiaqatigiit pillugit immikkut ilisimatusarfimmi pisortaq, Maria Ackrén taama oqarpoq.

Taassuma ilanngullugu oqaatigaa, inuiaqatigiit kikkulluunniit partiillu pisinnaatitaaffeqarmata, Inatsisartut ataatsimiittarfissaata sumi inissisimanissaanik siunnersuuteqassallutik.