Takornariartaatileqatigiiffik: Ilaasunut nutaanik akitsuusiisalernissaq siusippallaaluatsiarpoq
Aningaasaqarnermut naalakkersuisup, Erik Jensenip (S) decembarip 18-iani akissuteqarneranik nutarterneqarpoq.
Nunatsinni umiarsualivissinneq takornariartaatileqatigiiffiit umiarsuinut tuusintilikkuutaanik ilaasoqarlutik nunatsinnut tikittartunut akitsortussanngorpoq.
Nunarpummi takornariartaassuarni ilaasunut akitsuutinik nutaanik ukiortaami atuutilersitsissaq. Tamannalu norskit takornariartaatileqatigiiffiannut, Hurtigruten Expeditionsimut, sunniuteqangaatsiartussaassaaq. Takornariartaatileqatigiiffiup taassuma umiarsui ukiumut 100-nit ikinnerunngitsoriarlutik nunatsinnut umiarsualivissittarput.
Hurtigruten Expeditionsip pisortaata tullia, Karin Strand, taama oqarpoq.
- Kalaallit Nunaanni angallassinitsinni umiarsualivissinnermut akitsuutinut aningaasartuuteqangaatsiartarpugut. Angallassinissatsinnik neqeroorutitsinnillu ukiut marluk-pingasut sioqqullugit pilersaarusioreerlutalu tuniniaasarpugut, taamaammat assersuutigalugu umiarsualivissinnermut akitsuutinut nutaanut ukiortaami aningaasartuuteqarnerulingaatsiartalereertussanngornerput unamminarpoq.
Hurtigruten Expeditions nunatsinnut 2024-mi 2025-milu angallassinissaminut pilersaarusioreerpoq, taamaammallu akitsuutit nutaat atuutilerpata aningaasartuuteqarnerusalernissamut ataqatigiissaariniapiloorpoq.
- Allaammi ilaasussatsinnut - suli - akileeqqeqqusinngilagut. Aningaasartuuteqarnerulernissatsinnulli arlaatigut qanoq iliuuseqartariaqarpugut, angallassinikinnerulinngikkaluarlutalu tamatuma qanorpiaq iliuuseqarfiginissaa misissuleruttorlugu, taanna oqarpoq nangillunilu:
- Innimiinniisoqareerpoq, taakkulu angalanissaat aalajangersimasumik akeqarput. Taamaammat taakkulu isumaqatigiissutigeriikkatsinnik atorunnaarsitsinissatsinnut pissutissaqarluartariaqarpugut.
Siusippallaaluatsiarnera akunnakusoorutigigaat – nutaanik akitsuusiisalernissaq pinnagu
Hurtigruten Expeditions nutaanik akitsuusiisalertussanngornissamut akerliunngilaq. Ilaasunummi akitsuutit akiligassanngortussat siornatigut akilertareerpaat.
Ingammik Kalaallit Nunata inuinut akitsuutit iluaqutaassappata akerliunavianngilagut, Karin Strand nassuiaavoq.
Attaveqaasersuuteqarnermut innuttaasullu aningaasaqarnerannut attanneqarsinnaasumillu takornarialerinermik siuarsaanermut iluaqutaasussaatillugit akitsuusiisalernissaq tunngaviatigut akerlerinngilarput.
Akitsuutit nutaat atuutilersinneqarnissaannut piffisaliussaq, tassaavoq Norgemi umiarsuarnik takornariartaatileqatigiiffimmut ajornartorsiortitsisoq.
- Tamanna ajornartorsiutaanerpaavoq. Kalaallit Nunaannut angalanissanut atatillugu akitsuutit allanngunnginnissaat siornatigut naatsorsuutigineqarsinnaasarsimavoq malittarisassat ingerlatsinermullu tunngasunut nutaat ilisimaneqareertaramik. Allannguuteqarnissamillu siunnersuuteqartoqaraangat piffissaqarluarluni taamani ilanngunneqartarlutik. Tamannali nualluutip covid 19-ip kingornatigut allanngungaatsiarpoq, taanna oqarpoq nangillunilu:
- Naleqqussaanerit taamaattut ingerlatsivinni assiigiinngitsorpassuarni aamma pisarput, taakkulu ataqatigiissarneqarluarsimasanngimmata ingerlatsinermi suliatsinnik aningaasaqarnitsinillu ataqatigiissaariniapiloortariaqartarpugut. Kalaallit Nunaanni taamatut ineriartortoqarnera ernummatigisorujussuuarput, piffissamillu taama sivikitsigisumik piffissalerluta nutaanik akitsuuseeqqinnerup nalunaarutiginera siunissami pinaveersaartinneqarnissaa pillugu neriuppugut oqaloqatigiikkumaarluta. Pissutsit taamaatillugit Kalaallit Nunaanni angallassisarnitsinnut ajornarkusoortitsingaatsiartussaassaq.
Nunatsinni ukiuni tulliuttuni angallassinissatik pilersaarusioreersimammatikkit nutaanillu akitsuusiisoqartaleriarpat taakku akigititaminnut ilannguttalersinnaanngorumaarmatikkit umiarsuatik Kalaallit Nunaanni umiarsualivissittartussat ikinnerulernavianngitsut, Karin Strand ilisimatitsivoq.
Naalakkersuisoq: Akitsuutit pitsanngorsaanissamut aallartitsipallassapput
KNR-ip aningaasaqarnermut naalakkersuisoq, Erik Jensen Hurtigruten Expeditionsip isornartorsiuineranut atatillugu oqaaseqartippaa.
Erik Jensen allakkatigut akissummi allappoq:
- Naalakkersuisut Inatsisartullu umiarsuarnik takornariartitsisartut takornariartaatigut akitsuutit 2024-mi januaarip aallaqqaataanit atuutileratik 2025-mi januaarip aallaqqaataanit atuutilernissaat kissaatigigaluaraat ilisimavarput. Malittarisassalli uku 2024-mi januaarip aallaqqaataanti atuutilereernissaat pisariaqartoq politikkikkut isumaqatigiissutigineqarpoq
- Tamanna suliffeqarfinnit taakkunannga nammineq kommuniniillu umiarsuavinni eqqaanilu pitsanngorsaasoqarnissaanik pisariaqartitsisoqangaatsiartoqarneranik ersersitsinerpassuarnik minnerunngitsumik pissuteqarpoq. Sumiiffiit ilaanni tikittunut atortulersuisoqassaaq, perusuersartarfilersuisoqassaaq assigisaannilluunniit. Sumiiffinni allani umiarsualiviit iluarsartuunnissaat imaluunniit allilerneqarnissaat pisariaqartinneqarpoq.
- Umiarsuarnik takornariartitsisoqartarnera ukiuni kingullerni ineriartungaatsiarnikuuvoq, nunarpullu siunissami tikinneqarumasuunissaa naatsorsuutigaarput. Taamaammat takornarianut atortorissaarutit pitsanngorsarnissaat maanna pingaarnersiulereernissaat pingaaruteqarpoq. Umiarsuarnut takornariartaatinut akitsuutit taakkununnga aningaasartuuteqarnerunerpunt pingaartumik tapiissutaassapput.
Umiarsuarnut takornariartaatinut akitsuuteqarnissamut inatsisissatut siunnersuut Inatsisartunit ukioq manna novembarip 14-iani isumaqatigiissutigineqarluni akuerineqarpoq.
