Ikummatissanik akitsuineq ATAATSIMUT ISIGALUGU
Polaroilip ikummatissanik akitsuinera aggustip aallaqqaataani atuutilerpoq. Solaari liiterimut 54 ørenik akitsorpoq, petruuliu liiterimut 55 ørenik akitsorluni Benziinalu liiteriimut 39 ørenik akitsorluni. Ikummatissanik akitsuinerup kingunerisaanik Nukissiorfiit, Mittarfeqarfiit Air Greenlandilu aamma akitsuilersaarput.
Uuliap akuiarneqanngitsup akuiarneqarneranullu assigiinngissutinut isumaqatigiissutit nappartamut akiat 2013-imut naleqqiullugit 2014-imi Amerikamiut aningaasaannik 10 dollarsinik akisunerusoq, nunarsuarmili akigitinneqartunit suli appasinnerulluni, Polaroilip taama qaffaanerminut nassuiaatigaa.
AAMMA ATUARUK Ikummatissat akitsorput
Ikummatissat liiterimut akii ullumikkumiit imaalerput:
Solaari 6 koruuni 11 øremit 6 koruuni 65 øremut akitsorpoq. Petruuliu 6 koruuni 21 øremit 6 koruuni 76 øremut akitsorpoq benziinalu 6 koruuni 11 øremit 6 koruuni 50 øremut akitsorluni.
Polaroilip orsussanik akitsuinerata kingorna, Mittarfeqarfiit aamma akitsuipput. Solaari, benzina, petroliu aamma timmisartut orsussaat JET A-1 taamatullu AVGAS akitsorneqarlutik.
Air Greenlandi aamma akitsuivoq
Polaroilip ikummatissanik akitsuinerata tamanna kingunerissavaa.
Air greenlandip nammineq nalililiinera naapertorlugu ikummatissat akitsornerat timmisartuutileqatigiiffimmut 15 millioninik akeqassaaq.
- Taannalu akitsuineq takorlooruminaappoq atuisunut sunniuteqanngitsoornissaa, tassa imaappoq akit billetinut akiutitaasut imaluunniit nassiussiniarnermut akigititaasut taakkua eqqorneqarnissaat pinngitsoorneqarsinnaassagunanngilaq, Air greenlandimi sulisoqarnermut pisortaq Mads Christensen taama oqarpoq.
AAMMA ATUARUK Air Greenlandip timmisartuutaannut ilaaneq akisunerulissaaq
Nukissiorfiit kiassarnermut kallerup inneranillu atuinermut akitsuissapput
Polaroilip orsussanik akitsuinerata kinguneranik, Nukissiorfiit kiassarnermut kallerup inneranillu atuinermut akitsuinissartik, septembarip aallaqqaanit atuutilersumik naatsorsuutigilerpaat.
Tamannalu Nukissiorfiit akigititaasa qaffasinnerpaaffiinut minnerpaaffiinullu siunniuteqassasoq, Nukissiorfimmit nalunaarutigineqarpoq.
Kallerup innerianik atuinermi, qaffasinnerpaafimmi akigitinneqartut maannakkut 3,29 øreqartut 3,47 øreqalissapput, tassa KiloWatt Time-mut 18 øre-mik akitsussallutik. Minnerpaaffimmilu akigitinneqartut, maanna 1,62 øremik akeqartut 1,71 øreqalissapput, tassa Kilo Watt Time-mut 9 øremik akitsussallutik.
Kiassarnermut akit Kilo Watt Time-mut 7 øremik akitsorneqassapput, taamaalilluni innaallagiaq atorlugu kiassarnermut aalajangersimasumut ungasianillu kiassarnermut aalajangersimasumut akigitinneqalissalluni, Kilo Watt Timemut 87 øre. Kiisalu innaallagissamik kiassarnermut ungasianillu kiassaanermut qaninneqarsinnaasunullu akigitinneqalissaaq, Kilo Watt Time-mut 82 øre.
Nukissiorfiit akitsuinissamik pilersaarutaat, Naalakkersuisunit akuersissutigineqaqqaartussaassapput.
Atassutip akissaatikitsut eqqorneqarnissaat annilaanngatigaa
Qaffaannginnermi akit atuutilerseqqinneqarnissaannik Polaroil Naalakkersuisunit piumaffigineqassanersoq, Atassutip apeqqutigaat.
Atassutip annilaanngatigaa, akitsuinikkut Nunatsinni akissaatikitsut eqqorneqarnerpaanissaat, tassami inissiat amerlanerpaartaat orsussaq atorlugu kiassarneqartarmata.
Aningaasarsiat pisissutigineqarsinnaanerat annikilleqqunagu SIK oqariartuuteqarpoq
Sulisartut Kattuffiata, SIK-p, siulittaasuata, Jess G. Berthelsenip, paaserusuppaa, orsussat akitsornerinut suut pissutaasimanersut.
SIK-p siulittaasuata aamma paaserusuppaa, qaffaanermut taama annertutigisumut, Naalakkersuisut akuersisimanersut.
AAMMA ATUARUK Atassutip SIK-llu orsussanik akitsuineq paasisaqarfigerusuppaat
- Naalakkersuisut qaffaanissamut akuersisimagunik, aningaasarsiallu pisissutigineqarsinnaanerat annikillissanngippat allatigut akikilliliisariaqarput, tassami sulisartut aningaasarsiaannut isumaqatigiissutigineqartut aatsaat taamaaliornikkut attorneqassanngimmata isumaqatigiinniarnermilu angusat unioqqutinneqaratik. SIK-p siulittaasua Jess G. Berthelsen allappoq.
