Ikuallattoqarnerata kingorna ima isikkoqarpoq
Ikuallanneq unnuap-qeqqata ataatsillu akornanni pilerpoq ajoqusernerillu annertupput.
- Illutaa atorsinnaajunnaavissortutut isikkoqarpoq, kisianni silataanit taamaallaat takusinnaagatsigu ajoqusernerit qanoq annertutiginersoq erseqqissumik takusinnaanngikkallarparput, O.S. Electronicsip pisortaa Ib Lagersted oqarpoq.
Nuummi suliffeqarfik ikuallattoq
Ikuallanneq sumi qanorlu aallartissimanersoq misissorniarlugu politiit illup iluani iseqqammerput, Ib Lagerstedillu ualip ingerlanerani erseqqinnerusumik paasitinneqassalluni neriuutigaa.
- Ikuallattoqarnera illup isaariaata nalaani aallartissimarpasippoq, tassanilu arsakoorfeqarluni. Sikaratsimik qamitsineq kingulleq ikuallattoqarnera sioqqullugu nalunaaquttap akunneri aqqaneq-marluk qaangiuttut pisimammat pasinarpaluppoq, Ib Lagersted.
Suliffeqarfik Nuummi Sømandshjemmip akiatunginnguaniippoq, qujanartumilli ikuallattoqarneranut atatillugu inunnik ajoqusertoqaranili illunik eqqaaniittunik ajoqusertoqarsimanngilaq.
Ib Lagerstedip oqaatigaa illu illullu iluaniittut - sullitat pigisaat ilanngullugit - ikuallattoornissamut sillimmarserneqarsimasut.
- Ajoqusersimasut sapaatit-akunnerata naanerani nalilersussavagut sullitatsinullu paasissutissiissalluta.
O.S. Electronics umiatsiat atortorissaarutaanik elektroniskinik pilersuisuuvoq umiarsuillu atortorissaarutaanik aamma iluarsaassisarfiulluni. Suliffeqarfik katillugit tallimanik sulisoqarpoq