ICC-p ataatsimeersuarnera Inuvimmi ammaanersiorneqarpoq
Nunatsinnit, Chukotkamit, Canadamit Alaskamiillu aallartitat Canadami Nordvestterritoriami Inuvimmi ICC-p ataatsimeersuarfissaanut tikereerput.
Allattoq Hagen Højer Christensen, Simon Uldum
juulip 21-at 2014 04:57
Ataatsimeersuarneq ukiut sisamakkuutaarlugit pisartoq ippassaq sapaammi ammarneqarpoq juulillu 24-ata tungaanut ingerlanneqassalluni.
Nunallu aallartitaasa saniatigut Inuit, alaatsinaattut, politikerit tusagassiortullu 600-t illoqarfeeqqamut Issittup imartaata killinganiittumut tikissangatinneqarput.
Amerlanersaallu angalangaatsiarsimapput. Nunatsinneersut ippassaq Inuvimmut tikittut, ullup aappaa avillugu angalasimapput.
Aqqaluk Lynge inuulluaqquneqassaaq
Ataatsimeersuarnermi ICC-p nunani tamalaani præsidentiata Aqqaluk Lyngep ukiuni qulini præsidentioreerluni tunuarfissaani sammineqartussat tassapput Issittup siunissaa aamma silap pissusiata nagguteqatigiinnut Inunnut sunniutigisai.
Nunatsinnit pisortatigoortumik aallartitat tassaapput Naalakkersuisut siulittaasuat Aleqa Hammond aammailaqutariinnermut Inatsisinillu atortitsinermut naalakkersuisoq Martha Lund Olsen.
Aleqa Hammond ataatsimeersuarnermi naalakkersuinikkut oqalugiaateqartussat pingaarnerit ilagissavaat. Inuvimmiinnermini aamma Issittumi Siunnersuisooqatigiit siulittaasuat, Candamiut avatangiisinut ministeriat, Leona Aglukkaq aamma ataatsimeeqatigissamaarpaa.
