GSG ukiumut 50 millioninik akeqartassaaq
Nunatsinni ujarassiuutut misissuisoqarfimmik GSG-mik taaguuteqartussamik pilersitsisoqarnissaanik takorluugaq ukiumut 51,5 millioninik akeqassaaq. Demokraatit siulittaasuata Anda Uldumip naalakkersuisumut Jens Erik Kirkegaardimut § 37 naapertororlugu apeqqutaanut akissummi tamanna atuarneqarsinnaavoq.
GEUS-p suliarpassuisa ilaat GSG-imit ingerlanneqalernissaat eqqarsaataavoq, taamaaliornikkut aatsitassat uulialu pillugit paasissutissarpassuit nunatsinni katersorneqartut Nunatsinnit pigineqalerniassammata.
GSG-taassaaq 40-nik sulisoqassaaq, taakkunannga 25-t ilisimatuussutsikkut suliaqartuussallutik 25-llu allaffissornermik suliaqartuussallutik. Ingerlatsinermut aningaasaliissutit 40 millioniussapput, taakkulu qaavigisut suliniutinut aningaasaliissutit 11,5 millioniussallutik. Katillugit 51,5 millionit koruunit. Illuutinik sanaartornissamut atortuutinullu annertuumik aningaasartuuteqarnissaq soorunami aamma ilanngunneqassaaq.
Aningaasalli tamaasa nassaariniarneqaqqaartussaassanngillat. Aatsitassanummi naalakkersuisoqarfik 19,5 millionit koruuninik aningaasaliiffigineqareersimavoq, taamaammat akileraartarnermut naalakkersuisup Vittus Qujaukitsup aningaasat nassaariniagassai 32 millionit koruuniinnaassapput. Naalakkersuisulli aningaasaateqarfiit aningaasartuutit ilaannut aningaasaliisinnaanissaat aamma neriuutigaat.
Ujarassiuutut misissuisoqarfittaassaaq GEUS-imut naleqqiullugu annikinnerungaatsiassaaq, taassumami Kalaallit Nunaanni ukiumut 100 millionit atortarpai. Jens Erik Kirkegaardilli GEUS-ip suleqatigineqaannarallarnissaa aamma erseqqissaatigaa.
Naalakkersuisut aatsitassat pillugit periusissaat malillugu, GSG-taassaaq ukiut sisamat tulliuttut ingerlaneri pilersinneqartussaavoq. Taamatullu nalunaaruteqarsimanerat qularutiginnittut ilaasa isornartorsiorsimavaat, isumaqaramik piginnaasanik annertusaanissaq sulisussarsiornissallu sivisunerusumik ingerlanneqartussaassasoq. Tamaammat aamma GEUS-imik suleqarnissaq periusissap suliarineqarnerani kingullermi eqqaaneqarsimavoq, suleqatigisassaq taanna periusissap suliareqqaarnerani eqqaaneqarsimanngikkaluarluni.
