GHF-ip sinniisutut aallartitat ataatsimiinnissaat ullulerpaa
Kalaallit Nunaanni Assammik arsartartut Kattuffianni aaqqiagiinnginneq ilaatigut sinniisutut aallartitat immikkut ittumik ataatsimiinnissaannik kinguneqarpoq, tassanilu ilaatigut naammagittaalliuutit, Hans Lyberthip paasissutissiissutigisimasa, eqqartorneqassallutik.
Allattoq Peter Troelsen, Simon Uldum
juunip 27-at 2013 07:37
Naammagittaalliuutit siulittaasutut tunuartup atorfimminik ingerlatsineranut tunnganerupput. Immikkiut ittumik ataatsimiinnissami GHF-imi inuit timersoqatigiiffiillu ukiorpassuarni aaqqiagiinngissuteqartarnerat unitsinneqarsinnaanersoq aamma sammineqassaaq. Pissutsit maannakkutut isikkoqartillugit, GHF kattuffittut susinnaajunnaarsitaaqqavoq ingerlasinnaananilu.
Sinniisutut aallartitat ataatsimiinnissaat Nuummi GHF-ip allaffiani marlunngornermi juulip aappani pissaaq, Nuummeersuullu allaffimmukarnissaminnut tikilluaqqusaapput. Sinerissamit peqataasut oqarasuaatikkut peqataatinneqassapput. Taasisinnaatitaasut kisimik ataatsimiinnermi oqaaseqarsinnaatitaanissaat aamma paasissutissiissutigineqarpoq.
