Gay pridet tallimassaat piareerpoq

Arfininngorneq juunip 14-ianni ukiut tallimassaannik Nuummi Gay Pride ingerlanneqassaaq. Ullorlu taanna atuagaq nunatsinni suiaqatiminnik aappaqartartunut tunngasoq saqqummissooq, nuannannerlu taamaalilluni annertusaaffigalugu.
Allattoq Hagen Højer Christensen, Elisa Isaksen
juunip 06-at 2014 05:22

Nuuk Gay Paradertitsisartut, Nuka Bisgaard peqatigalugu atuakkiortorlu Hjalmar Dahl saqqummersitsisarfik Milik peqatigiillutik ulloq  juunip 14-iat persuarsiornartunngortippaat, taamaalillutillu nunatsinni suiaqatiminnik aappaqartartut atugarisaat ersersinniarlugit.

Naak suiaqatiminnik aappaqartartunut isiginninneq ukiut ingerlanerini allannguuteqarsimagaluartoq suli pitsanngorsagassaqarpoq.

Hjalmar Dahl atuakkiamini taaguutilimmi "...inuugatta" suiaqatiminnik aappaqartartut apersorsimavai, tassanilu unneqqarillutik oqaluttuaat atuarneqarsinnaapput. Atuakkiortup politikkikkut, inatsisitigut kiisalu upperisarsiornikkut ilisimasai tunngavigalugit, suiaqatiminnik aappaqartartut atugaat eqqartorneqarput.

"...inuugatta" nunatsinni suiaqatiminnik aappaqartartut atugaat, nuannersut nuanniitsullu pillugit oqaluttuaasoq, Milik tusagassiuutinut nalunaarummi allappoq.

63-inik ukiulik Hjalmar Dahl Qaqortumi inunngortuuvoq, ukiorpaalunnilu ICC-mi siulersuisuni ilaasortaalluni, kiisalu Kalaallit Nunaata inuit pisinnaatitaaffiinut siunnersuisoqatigiivini siulittaasuusimalluni. Atuakkiaa siulleq "Aasivik - Inuit isumasioqatigiiffiat, 2005-imi saqqummerpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq