GA: Siunnersuut atuarlugu nikalluallannarpoq
- Nunarput piitsunngoraluttuinnartoq atuarneqarsinnaavoq, allanngortiterinissallu pingaarutillit takuneqarsinnaanngimmata ernumanarpoq, Brian Buus Pedersen oqarpoq.
- Kalaallit Nunaanni periarfissarpassuaqarpugut, pisuunngussaguttali isumatuumik aalajangersaasariaqarpugut. Susassaqarfinni arlalinni allanngortiterinissat ukiorpassuanngortuni eqqartortakkavut piviusunngortinneqarnissaat amigaatigaarput, Brian Buus Pedersen oqarpoq.
Aamma isumaqarpoq ineriartortitsinissamik pilersaarummik piviusunngortitsinissaq piffissanngortoq, pisortat aningaasartuutaat amerliartuinnartut pinnagit naalagaaffiullu tapiissutai pillugit politikkikkut assortuunnerit unitsillugit.
AAMMA ATUARUK Naalakkersuisut annertuupilussuarmik amigartooruteqarnissaq pilersaarutigaat
Aningaasaleerusussuseqalersitsisussamik pilersitsisoqartariaqarpoq ilinniarnerillu qaffassarneqarnerannut pikkorissaanerillu pitsanngorsarneqarnerannut atatillugu tamaviaartoqarnerusariaqarpoq, taamaaliornikkut atorfiit nunatsinneersunit inuttalerneqarniassammata.
Nutarterit aallartinnissaat piffissanngorpoq
Pisortat suliffeqarfii sukkanerusumik sulisinnaanngortinneqartariaqarput, aqutsisut pitsaanerusunik taarsernerisigut aaqqissuussaanerillu ullutsinnut naleqqunnerusut atulernerisigut. Aamma pisortat suliarisartagaasa ilaat namminersortunit unammillerneqarsinnaasunngortittariaqaraluarput.
Taamatuttaaq aalisarnermi inatsit susassaqartunit Namminersorlutik Oqartussanillu nutarterneqartariaqarnerarpaa, aalisarnerup ineriartortinneqarnissaa pillugu anguniakkamik pilersitsisoqarniassammat.
- Aalisarneq pillugu politikkimi siunnersuutaasartut immikkuualuttuusarmata uggornartaqaaq, ataqatigiinnerusariaqaraluarput siunnerfeqarnerusariaqaraluarlutillu, Brian Buus Pedersen naliliivoq.
Sulisitsisut Peqatigiiffiat Naalakkersuisunit Aningaasanut Inatsisissamut Siunnersuut pillugu ataatsimeeqatiserineqarsimavoq.