GA: Kommuneqarfik Sermersooq ujajaaffigineqarpoq
Aningaasammi pineqartut ima amerlatigilersimapput naligiissaarinermut aaqqissuusseqqinnermik taaneqarsinnaajunnaartoq, kommunimilli aaqqissuusseqqinnermik taaneqarsinnaanngorsimalluni. Sulisitsisut peqatigiiffiata GA-p pisortaa Brian Buus Pedersen taama oqarpoq:
- Kommuneqarfik Sermersuumit ujajaaniarnersuarmik maanna taaneqarsinnaalersimavoq, GA-p pisortaa Brian Buus Pedersen oqarpoq.
Kommuneqarfik Sermersuup aningaasanik amerlanerusunik kommuninut pingasunut allanut tunniussaqarnissaa, kommunit taakku pingasut piumasarivaat, kingunerisinnaasaali eqqarsaatigisimanagit, GA-p pisortaa oqarpoq:
Akisussaaffiit aningaasartuutissallu imminnut malittariaqarput
- Aningaasat taakku kommunimit ataatsimit aaneqarpata kingunissai, borgmesterit pingasut taakku eqqarsaatigisimanngilaat. Kommunillu aqunneqarneranni akisussaaffiit aningaasartuutissallu imminnut malittariaqaraluarput, Brian Buus Pedersen oqarpoq.
Nalimmaassaanermi aaqqissuusseqqinniarnerup maannamut ingerlarnga, taassuma apeqquserpaa, nalorninartortaqarpallaarsoralugulu. Aaqqissuusseqqinniarnerup kingunerisinnaasai, taassuma paaseqqaarusuppai.
Tassami aaqqissuusseqqinniarnermi maanna siunniussat piviusunngussappata, soorlu Qaasuitsup Kommuniata, Qeqqata Kommuniata Kommune Kujalliullu tamanna piumasarigaat, taava pisortat aningaasartuutaat amerlissapput, suliffeqarfiillu innarlerneqassallutik, Brian Buus Pedersen oqarpoq:
Suliffeqarfiit eqqorneqarsinnaapput
- Suliffeqarfinnut atatillugu oqarusuppunga, pilersaarut makku ima kinguneqassammata pisortat aningaasartuutaat amerlissammata, tamakkulu matussuserneqassappata, aningaasat arlaannit aaneqartariaqassapput, suliffeqarfiillu matumani eqqorneqarsinnaapput, GA-p pisortaa oqarpoq.
Kalaallit Nunaat aningaasarsiornikkut ajornartorsiortoq, ajornartorsiutillu siunissaq qaninnerusoq eqqarsaatigalugu aaqqikkallarnaviangitsut, Naalagaaffiup Aningaaserivissuata qanittukkut aarlerinartoqartikkaa, GA-p pisortaata oqaatigaa:
- Aningaasat Kujataani Avannaanilu sumut atorniarneqarnersut sukumiinerusumik paaseqqaarnagu iliortoqarpoq, aningaasartuutillu saniatigut amerlineqarniarlutik. Tamassuma kingunerissavaa innuttaasut akileraarnerusalissasut, soorlu aamma suliffeqarfiit akileraarnerusalissasut, innuttaasullu sumiiffiit ilaanni sullinneqarnerat ajornerulissalluni, Kalaallit Nunaanni Sulisitsisut Peqatigiiffiata pisortaa Brian Buus Pedersen oqarpoq.
