Finn Karlsen: Inatsisartut naalattariaqarpakka
Qaleralinniarneq piujuaannartitsisumik ingerlanngilaq, tamannalu Aalisarnermut Naalakkersuisup nalunngilluinnarpaa. Inatsisartut aalajangernerat ernumanartoqartikkaluarlugu parteeqatimi maliinnartariaqarnissai Naalakkersuisup oqaatigaa.
- Uanga Inatsisartut aalajangereersut, taasereersut, akerliuffugiinnarukkit Naalakkersuisuunera attatiinnarsinnaanngilara. Uanga Inatsisartut pinngitsoornanga naalatassaraakka. Qaleralinniarneq pillugu tunuarnissara naatsorsuutiginngilara, Finn Karlsen oqarpoq.
Una aamma atuaruk: Qaleralittassanik qaffaanerit IA-mit isornartorsiorneqartut
KNAPK aamma Aalisarnermut Naalakkersuisuusimasoq, Ane Hansen, ernummassuteqarlutik qisuariaateqareerput. Ilaatigut sumiiffinni aalajangersimasuni qaleralinnik killeqanngitsumik aalisarsinnaanerup nunatta aningaasaqarneranut aseruisinnaanera taakkua aarleqqutigaat. Aalisakkanik misissuisartut oqarput, nungusaataanngitsumik 20.000 tonsinik qaleralinniartoqarsinnaasoq, kisianni ukioq mannamut pisassiissutaasut 6.000 tonsinik qangerneqareerput. Siunnersuutip Inatsisartuni suliarineqarnerani Aalisarnermut Naalakkersuisoq sunniuteqaqataarusukkaluarsimavoq, kisianni iluatsinngitsumik:
- Allannguutissamik siunnersuuteqaraluarpunga, Naalakkersuisutut pisinnaatitaaffeqarnissannut tunineqarnissannut qinnuteqarlunga, kisianni taanna itigartinneqarpoq, Finn Karlsen oqarpoq.
Taassumalu oqaatigaa ernummassuteqartut paasilluarsinnaallugit:
- Aarleqquteqartoqarpat uanga aamma tupiginngilara, pingaartumik Qeqertarsuup tunua sapinngisannik peqqissaarnerusumik suliarineqarnissaa uanga ingerlakkusukkaluarpara. Paasiniarusukkaluarpara qanoq isiorluta pitsaanerusumik taavani aalisarneq ingerlanneqarsinnaanersoq. Aalisartut peqatigalugit aaqqiissuteqarniaraluarpunga, kisianni tassa Inatsisartunit sukkasuumik, tuaviortumik allanngortiteriumasoqarpoq. Taamaammat tamanna uanga aamma naalattariaqarsimavara, Aalisarnermut Naalakkersuisoq, Finn Karlsen oqarpoq.
