Filimiliarpassuit Nuummi takutinneqalerput

Greenland Eyes Film Festival 2014 - Kalaallit Nunaat aamma Kalaallit Nunaanni filmiliat ikinngitsut, ullumimiit aallartittumik Nuummi takutinneqaqattaassapput.
Allattoq Jaaku Lyberth
aggustip 28-at 2014 12:19

Filmiliornermik ilitsersuisartup Ivalo Frankip filminik Kalaallit Nunaannut tunngassuteqartunik festivalertitsineq aappassaa aaqqissuuppaa.

Filmit takutinneqartussat nunani allani takutinneqarnissaat sioqqullugu Nuummi takutinneqaqqaassapput, filmillu taakkua Københavnimi, Savalimmiuni, Islandimi, Sverigemi, Saamit Nunaanni Norgemilu tamatuma kingorna takutinneqassallutik.

Filmit 30-t sinneqartut isiginnaarneqarsinnaapput taakkua filmelioriaatsinik assigiinngitsunik suliaapput - ilaat naatsunik filmiliat aamma filmit aliikkutassiat piviusulersaarutillu.

Greenland Eyesip nittartagaa alakkaruk

Filmit Greenland Eyes Festivalimi takutinneqartussat Nuummi kulturikkut illorsuarmi Katuami takutinneqassapput, Ilisimatusarfimmilu oqallitsitsisoqassalluni.
Kalaallit Nunaanni filmilianik toqqorsivimmik pilersitsisinnaaneq oqallisigineqartussanut ilaavoq, taamaalilluni Kalaallit Nunaanni aamma Kalaallit Nunaat pillugu filmit kulturikkut kingornutatut pigiuaannarneqarsinnaanissaat oqallisigineqassalluni.

Filmit Nuummi Katuami takutinneqartussat 32-upput taakkua septembarip pingajuata tungaanut takuniarneqarsinnaassallutik.

Taakkununnga ilaavoq Per Kirkebyp aamma Aqqaluk Lyngep filmiliaat 1972-imi suliarineqartoq "Naalakkersuisut oqarput tassagooq" aamarsuarsiorfik Qullissat matuneqarnerat pillugu filmiliaasoq.

Filminik nutaajunerusunik takutinneqartussanut ilaavoq Mike Magidsonip filmiliaa Inuk aamma filmi piviusulersaarut nunaqarfik Niaqornat pillugu filmiliaq kiisalu erinarsortartoq Simon Lynge pillugu filmiliaq piviusulersaarut Mikisoq H. Lyngemit suliarineqartoq.