Erngup nukissiorfia qularnaarneqarpoq

Erngup nukinganik nukissiorfittaaq Paakitsumiittoq, qaammatillu uuma aallartinnerani atoqqaarfiussiortinneqartoq, sannarluttoqarsimagaluarpat nutaanik isumaqatigiissuteqarnikkut qularnaarneqarpoq.
septembarip 20-at 2013 06:36

Erngummi nukinganik nukissiorfimmik sanaartortuusup, akiliisinnaajunnaaqqammersumillu Pihl og Sønimit pigineqarsimasup Istak-ip Paakitsumi suliassaq tamakkiisumik tigusimalerpaa.

Istak islandermiut bankiannit naalagaaffimmillu pigineqartumit Landsbankinnimit pisiarineqarsimammat, Paakitsumi sanaartornermit aningaasanik annaasaqarsinnaaneq Nukissiorfinnit ernummatigineqanngitsoq, Nukissiorfiit pisortaanerat Henrik Estrup nassuiaavoq.

- Isumaqatigiissutigisavut nutaat najoqqutaralugit, taava Istakkip siunissami sulineq ingerlateqqissamavaa. Aamma sillimmasersimanigut suli atuupput. Taamaattumik arlaannik susoqassangaluarpat suli sillimmatigut atuupput, Nukissiorfiit pisortaanerat Henrik Estrup taama oqarpoq.

Pihl og Søn-i akiliisinnaajunnaariartoq Nukissiorfiit siunnersortaat akiliisinnaajunnaarnerup kingunerisinnaasaanik misissuillutik aallartipput:

- Eqqartuussisuserisorput Istakkillu eqqartuussisuserisua misissuilluarsimapput. Isumaqatigiissutigineqarporlu Istakkip Pihl og Sønip akisussaaffigisimasai tamaasa tigussagai. Tassa siunissami sanaartornerullu nalaani akisussaaffiusinnaasut, Henrik Estrup oqarpoq.

Sanaartornerup ingerlanerani sanaartortitsisut sanaartornerup nalingata 15 procentianik sillimmasersimapput, tassa 85 milion koruunit nalinganut:

- Erngup nukinganik nukissiorfiup tiguneranut atatillugu sillimmatip nalinga 10 procentimut appartinneqarpoq, tassa 57 million koruunit nalinganut. Tassalu taakkua arlaannik sanaartornerluttoqarsimassangaluarpat sillimmatigaagut, Henrik Estrup oqarpoq.