Demokraatit sunniuteqaqataanissaannut inuusuttut aqqutissiuussissasut
Anda Uldum siulittaasutut qinigaaqqippoq. Siulittaasup tullianik qinersisoqalermat Randi Vestergaard Evaldsen periarfissaq kingulleq atorlugu sassarpoq, qinersisinnaasunillu 13-iusunit aqqaneq-marlunnit qinerneqarluni ajugaavoq.
Tamanna Demokraatit siulittaasuattut qinigaaqqittup, Anda Uldumip, nuannaarutigaa.
- Soorunami nuannaajallappunga. Randi Vestergaard Evaldsen ulapinnikooqaaq. Politikkimik suliaqarnikooqaaq, taamaammat qinigaammat isumalluarlungalu nuannaarpunga, Anda Uldum KNR-imut oqarpoq.
Suleqataanissamut piareersimavoq
Siulittaasup tulliatut qinigaasup Randi Vestergaard Evaldsenip suliassarilerpaa Inatsisartunut qinersinermi kingullermi Demokraatit kinguariarsimanerat allanngortissallugu.
- Demokraatit inuusuttai ukiuni kingullerni uummarteqqillugu assoruulluta sulinikuuvugut, assigiinngitsunillu oqariartuuteqartarluta. Massakkut aamma taamatut sulissaanga, Randi Vestergaard Evaldsen oqarpoq.
Siunissaq isumalluarfigaa
Anda Uldumip isertuutinngilaa Palle Frederiksen aamma Jens B. Frederiksen partiimit animmata Demokraatinik qinersisartut ikileriarsimanerat.
Massakkulli siulersuisuunerit allanngorneri Demokraatit siulitaasuata isumalluarnartoqartippaa.
- Massakkut nukissanik nutaanik soqutiginarluinnartunik partiitta iluani pilersitsivugut. Siunissaq qaamasutut isigivara, Demokraatit siulittaasuattut qinigaaqqittoq, Anda Uldum, taama oqarpoq.
Siulersuisuunernut ilaasortanngortut
Demokraatit ataatsimeersuarneranni Demokraatit sinerissami ersarinnerulernissaat pingaarnertut oqaluuserineqarpoq. Siulersuisuunerni ilaasortat sinerissameersut amerlineqarnerisigut tamanna anguniarneqarpoq.
Siulersuisuunernut qinersinermi Klara Jakobsen Ilulissat, Stine Lange, Qaqortoq, kiisalu Rene Caspersen Sisimiuneersoq qinerneqarput.
Randi Vestergaard Evaldsenip siulittaasup tulliatut qinigaaneratigut maannamut siulittaasup tulliatut inissisimasoq Aviaaja Karlshøj Poulsen Demokraatit siulersuisuunerini ilaasortaajunnaarpoq.
