Danskit marluk qullartartuliaq iluaqutsiullugu Sermersuakkut angalasimasut

Sisoraaserlutik qullartartuliarlu atorlugu atortorissaarutitik kalillugit ingerlaarfigisaminni kilometerinik 2300-nik isorartutigisumi ilaanneeriarlutik nalunaaquttap akunneranut kilometerinik 70-inik sukkatigisumik ingerlaartarsimapput.
 
Nutaarsiassaqartitsiviup Sjællandske Medier angalasut allaaserai ilaatigullu videokkut takusassiaralugit, taannalu uani isiginnaarsinnaavat.

Ingerlaarfigisaat soorunami ississimaqaaq, isikkamillu assamillu kissassimaartinnissaat ajornakusoortittarsimavaat, qujanartumilli qerittoorsimanngillat.

Aqqut navianartortalik

Ingerlaarfigisaanni aqqut navianarnerpaaq tassaasimavoq Qaanaap eqqaa, tamatuma sermiani iluliarujussuaqarlunilu ujararujussaqarmat.
 
- Aqqutigisatsinni tutinerliorluta sermimik isamittoorluta nakkariaannaavugut. Nakkarfissarlu meterinik tallimanik ititigaluni, nakkaraluaruttalu ujarassuit nakkaasussaapput ajunaartillutalu, Sverri Warm Sjællandske Mediermut oqaluttuarpoq.
 
Sverri Warmili ajoquserani angerlamut apuuppoq, qinngamigulli siggummigullu seqinermit uungaatsiarsimavoq.

Ataasiarnertik naammagaat

2007-mi ukiukkut taamatut angalariaraluarput, apriilip 19-iani aallarlutik, kilometerilli 800-t ingerlareerlutik angalanertik unitsiinnartariaqarsimavaat. Angalatuut taakku marluk aamma qaasuitsup killeqarfiata nalaani ingerlaarfigineqartartoq atorlugu sermersuaq siornatigut itivissimavaat.
 
- Angerlamut apuukkatta eqqartorparput taamatut ingerlaaqqissanerluta. Isumaqatigiippugut taamaalioqqinniarata.
 
- Imaanngilaq eqiagigatsigu, misilereeratsigu aqqutaa uteqqikkusunngikkipput. Aamma sisoraaserluni kilometerinik 2000-nik qasseriarluni ingerlaqqinnissaq killeqarpoq, Sverri Warm oqarpoq.
 
Apeqqutaaginnarunarporli Sjællandimi illoqarfimmi Næstvedimi illumi issiatilluni qaqugu Kalaallit Nunaannukaqqikkusuummeqqissanersoq.