Danskit aatsitassat pillugit siunnersuisarnerat Nunatta atorunnaarniaraa
Siunnersuut naapertorlugu Kalaallit Nunaat nunat tamalaat paasissutissanik katersuivissaannik GeoSurvey Grønlandimik imaluunniit naalisarlugu GSG-mik taaguutilimmik pilersitsinialersaarpoq.
Tamatuma kingunerisaanik Danmarkip Nunattalu ujarassiooqarfiata, GEUS-ip, aatsitassanik piianermut tunngasut Nunatta nammineerluni isumagisarilissavai.
- GEUS-imik suleqateqarnerput iluarisimaartupilussuuarput, ujarassiuutulli misissuinerit maani Nuummi nammineerluta ingerlassinnaagutsigit pitsaanerussasoraarput, Nunatsinni aatsitassanut naalakkersuisoq, Jens-Erik Kirkegaard, atuagassiamut Ingeniørenimut oqarpoq.
GEUS ukiuni kingullerni 126-ni Nunatsinni ujarassiuutut ilisimatusarneq ingerlatarisimavaa, siornalu Nunatsinni illoqarfiit anginersaanni Nuummi aalajangersimasumik allaffeqarfeqalerluni.
GEUS-ip pisortaanerata Johnny Fredericiap tamaatut pilersaartoqarnera isumakuluutiginngilaa. Kalaallit Nunaata GEUS-imut isumaqatigiissutip ukiuni tallimani atuuttussap sivitsuiniarnera erseqqissaatigaa. Tamannalu pillugu isumaqatiginninniarnerit qaammatip matuma naanerani aallartinneqartussaapput.
- GSG-p pilersinneqarneratigut GEUS-imik suleqateqarnerup unitsinneqarnissaatut isiginngilarput, Kalaallit Nunaatali susassaqarfimmi pisinnaasaminik nukittorsaaniarnerminut peqatigitillugu uatsinnik suleqateqarnissaa naatsorsuutigaarput, Ingeniørenimut oqarpoq.
GEUS ukiumut 100 mio. koruunit missaat Nunatsinni atortarpai. Aningaasat taakku naalagaaffimmeersuupput, taamaammat GEUS-ip Nunatsinni suliaqarnera Nuummi immikkut ilisimasalinnit imaaliallaannaq taarserneqarnissaa ilimananngitsoq, Johnny Fredericia naliliivoq.
