Danmarkimi palasit suliassaasa agguaannerat pitsaanerulissaaq
Danmarkimi palasip ivertinneqaqqammersup Namminersorlutillu Oqartussat Københavnimi palasiata, Jens-Kristian Kleistip, akornanni Danmarkimi kalaallit ilagiit agguaanneqassasut, Danmarkimi kalaallit palasiata ivertinneqaqqammersup, Oline Berthelsenip, kajummissaarutigaa.
Oline Berthelsen, Århusip biskorfeqarfiani atorfeqarpoq, taamaalillunilu danskit ilageeqarnermut ministereqarfiata ataani sulilluni, kalaallillu Danmarkimut nuussimasut – Danmarkip sortaaniluunniit najugaqaraluarpata - sullisissagai juunip aallaqqaataanili suliassiissutigineqarpoq.
Massa Namminersorlutik Oqartussat palasiata kalaallit nammineq kajumissuserinngisaminnik Danmarkimiittut, soorlu nakorsiartut imaluunniit paarnaarussat, kisiisa sullittussaagai.
Agguaannerat equngasoqartoq, Oline Berthelsen isumaqarpoq. Taarsiullugu palasit taakku marluk kalaallit ilagiit nunami sumiissusaat aallaavigalugit agguaatissagaat siunnersuutigalugu.
- Palasit marluuvugut, aappaa Jyllandimi najugalik aappaalu Sjællandimi najugalik. Københavnimi ilisisoqassatillugu, uanga Jyllandimiit Københavnimut ilisiartorlunga aallarnanga taava palasip Københavnimi najugallip isumagiliuk.
Suleqatigiissitaq tapersersuivoq
Kalaallit namminneq kajumissutsiminnik Danmarkimut nuunnikut, Danmarkimi kalaallit ilagiivisa sinniisaannik pilersitsiniartut, siunnersuut tapersersorpaat.
- Kalaallit Danmarkimut nuunnikut ataasiinnarmik palaseqarpugut. Palasillu ataasiinnaap Kalaallit Danmarkimi sumiiffinni assigiinngitsuni najugallit tamaasa sullinnissaanut, palaasi ataasiinnaq naammanngilaq, ilagiit sinniisaannik pilersitsiniartut suleqatigiissitaasa oqaaseqartartuat, Henriette Berthelsen, oqarpoq.
Suleqatigiissitap danskit ilageeqarnermut ministereqarfiata kalaallinik palasinik amerlanernik atorfinitsitsinissaa piumanerugaluarpaat. Qallunaatut naalagiartarneq, qallunaatut oqaasilimmit katitinneqarneq ilisinerluunniit kalaallisut oqaaseqartuulluni naammanngilaq, Henriette Berthelsen isumaqarpoq.
- Uagutsinnut pitsaaneruvoq kalaallisut ingerlanneqarpata. Kulturikkut inuunitsinnut immitsinnullu attaveqatigiinnitsinnut upperisamullu tunngasut nammineq oqaatsitsinnik oqaluuserisinnaanissaat pingaaruteqarpoq, soorlu maani Danmarkimi ikinnerussuteqartut allat aamma taama misigisartut.
Ilagiit sinniisaannik pilersitsiniartut suleqatigiissitaat danskit ilageeqarnermut ministeriat Marianne Jelved (R) septembarip 29-ani ataatsimeeqatigissavaat.
