Danmark 100 millionit koruuninik Gazamut Vestbreddenimullu ikiorsiissutissanik nassiussisoq
Danmark 100 millionit koruuninik Gazamut Vestbreddenimullu ikiorsiissutitut atugassanik immikkut ittumik nassiussivoq.
Ineriartortitsinermut nunanullu tamalaanut politikkimut ministeri Dan Jørgensen (S) taama ilisimatitsivoq, Gazami Vestbreddenimilu pissutsit ullut tamaasa ajorsiartuinnartut erseqqissaatigalugu:
- Gazami Vestbreddenimilu pissutsit ajorluinnarput. Tunngaviusumik pisariaqartitanik tamanik amigaateqartoqarpoq, tamaanilu innuttaasunut tamanut tamanna eqquinerluppoq, pingaartumik meeqqat eqqorneqarlutik, Dan Jørgnsen oqarpoq.
Aningaasat 100 millionit koruunit imermut minguitsumut, nerisassanut, peqqinnissaqarfinnut ikiorsiinermut, tassa napparsimasunik ajoqusersimasunillu passussinermut atorneqassasut ministerip oqaatigaa.
Danmarkimilu naalakkersuisut Gazamut Vestbreddenimullu 100 millionit koruuninik nassiussinermi saniatigut allanik aamma nassiusseriaannaapput:
- Sorsunneq piaarnerpaamik soraarumaartoq neriuutigaarput. Ajornartorsiutilli piffissami qaninnermi aaqqiivigineqarsimanissaat takorloorsinnaanngilarput. Ikiorsiissutinik suli nassiussisoqartariaqassanersoq taamaammat sillimaffigaarput, Dan Jørgensen oqarpoq.
Aningaasat ilaasa ikiuiniaqatigiiffinni sulisunik paarsinissamut atorneqarnissaat aamma pilersaarutaavoq.