"Citronen" kinamiut suliffeqarfiannik isumaqatigiissuteqarpoq

Citronen Fjordimi suliffeqarfik aatsitassarsiorniaq, Ironbark Zinc Limited, Kinami nalagaaffiup suliffeqarfiutaata China Non-Ferrous Metal Miningip suleqatigiinnissamik isumaqatigiissuteqarfigaa.
apriilip 16-at 2014 09:08

Maannamut pisoq tassaavoq, China Non-Ferrous Metal Miningip ataani piginneqatigiifik siunertaqaqatigiinnermik isumaqatigiissuteqarfigineqarmat, pigineqatigiiffilli piiaanissamut akuersissummik tunineqarpat, kinamiut suliffeqarfiata kinamiit aningaasaliinissaq qulakkiissavaa. Berlingske Tidende ullumi taama allappoq.

Zinkisiorfiup Citronenip sanaartorneqarnera 2,7 milliardit koruuninik akeqarnissaa naatsorsuutigineqarpoq. Isumaqatigiissullu sanaartornermi naapertorlugu aningaasartuutissata 70 procentii kinamiut suliffeqarfiata qulakkiissavai, piginneataassutillu 20 procentiinik peqassalluni.

- NFC-ip Ironbarkimut suleqataanini qulakkeermagu nuannaarutigaarput, Ironbarkimi pisortat qullersaat, Jonathan Downes, aviisimut oqarpoq.

Citronen Fjordimi aatsitassarsiortoqalissappat, taanna nunarsuarmi aatsitassarsiorfinni tikikkuminaannerpaanut ilaalissaaq, ukiumut qaammatit marluinnaat umiarsuarmik tikinneqarsinnaaalluni.

China Non-Ferrous Metal Miningittaaq Greenland Minerals and Energy Kuannersuarni aatsitassarsiornissamik isumaqatigiissuteqarfigereerpaa.