Campus Kujalleq nerisassanik 800-inik ukiulinnik sassaallerput

Kujataani inuussutissanik igalluni festivaleqarneq, taaguutilik IGASA, sapaatip akunneranik ataatsimik sivisussuseqartussaq aallartittoq, Kujataanilu Qaqortumi Ilinniarnertuunngorniarfimmi, Campus Kujallermi 2.g-it tamanna aamma peqataaffigissavaat.
Allattoq Apollo Jeremiassen
septembarip 01-at 2014 08:39

Festivalimi iganeqartussanut ilaapput qanga qallunaatsiaat igariaasiat atorlugu inuussutissanik piareersaaneq iganerlu. Igaat qalappata, taakku qallunaatsiaat illorsuakuata assiganik sanaami nerineqassapput. Nerinermi atortut qanga aamma atorneqartartut assiginik atorloqarlutik sassaalliisoqassalluni. Qanga nerinermut atortut ilinniartunit sanaajupput, taakku katersugaasivinni pigineqartunik assilisaallutik.

Ilinniartut peqataanerminni atisat atugassaat aamma qanga qallunaatsiaat kalaallillu atortagaannut assigusut atorneqassapput, ilaatigut qallunaatsiaat siuttuisa atortagaasa assigi.

Nerisassanik sassaalliinerup nalaani qanga qiteriaatsit atorlugit aamma qitittoqassaaq, erinarsortoqarluni oqaluttuatoqqanillu oqaluttuartoqassalluni, Campus Kujallermi ilinniartitsisoq, Rie Oldenburg taama nalunaarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq