Borgmesteri: 106 millionit aningaasat ikittuunngillat

Kommuneqarfik Sermersuumi aningaasaqarnikkut ajornartorsiorneq, nalimmassaarinikkut agguaasseqqinnermut attuumassuteqanngilaq, kommunilli aningaasanut missingersuutiminik aqutsinnginneranik pissuteqartoq, Vittus Qujaukitsoq Siumumeersoq oqarpoq.

Taamatulli oqaaseqarneq Kommuneqarfik Sermersuup borgmesterianit IA-meersumit nuannarineqanngilaq.

- Ullumikkut aningaasanik amingaateqarpugut,  kattussuutinnginnermi kommuninut aningaasaqarnikkut isasooqqajaasunut aningaasaatigut atornikkuungatsigit. Tasiilami inissialiortitersimavugut,  sulissussinerlu illoqarfinni nunaqarfinnilu Nuup avataaniittuni kivitsiffigisimallugu.

- Tassa kommunip iluani nalimmassaarineq, tamannali taamaatinneqassaaq Naalakkersuisut komminini piitsuunerpaanngortippatigut, Asii Chemnitz Narup oqarpoq.

AAMMA ATUARUK Vittus: Sermersooq aningaasanik naammattunik tunniussinikuunngilaq

Aningaasaqarnermulli Nunamullu Namminermut Naalakkersuisup Vittus Qujaukitsup Sermersuup kommuninut allanut aningaasaliissutai ajasoorutiginngilai.

Annertuumik isumaqatigiinngissutigineqarpoq

- Kommuneqarfik Sermersooq ukiuni kingullerni nunap sinneranut aningaasaliivallaarsimanngilaq, naak kommunip isertitaasa ilai annertuut inuiaqatigiit suliffeqarfiutaarneersuugaluartut, Qujaukitsoq KNR-imut oqarpoq.

Pissutsitut piviusutut saqqummiussaq Asii Chemnitz Narupip upperivallaanngilaa.

- Vittus Qujaukitsup kisitsisit ilisimavai, taamaattumik isumaqarpat 106 millionit koruunit aningaasat amerlanngitsuusut paasisinnaanngilara. Sermersuumimi isumaqarpugut aningaasarpassuusut, borgmesteri oqarpoq innersuussilluni siorna kommunimi nalimmassaarinermut akiliutigisimasaanut.